‘నాట్యం’ క్లాసిక్ హిట్‌గా నిలిచిపోతుంది : చిరంజీవి

దిశ, సినిమా : ‘నాట్యం’ సినిమా ‘శంకరాభరణం’ మాదిరిగా క్లాసిక్ ఫిల్మ్‌గా నిలిచిపోతుందన్నారు మెగాస్టార్ చిరంజీవి. నాట్యం అంటే ఓ కథను అందంగా చూపించడమే కాదు అందంగా చెప్పడం ముఖ్యమన్నారు. సాధారణంగా ఇలాంటి సినిమాలు చూస్తే దర్శకుడు కె విశ్వనాథ్ గుర్తుకువస్తారని.. ఆయనను స్ఫూర్తిగా తీసుకునే ఈ సినిమాను తీసినట్లు కనిపిస్తోందన్నారు. కళలు, సంగీతం, నాట్యంపై ఆయనకున్న ప్యాషన్ గురించి గుర్తుచేసిన చిరు.. యంగ్ డైరెక్టర్ రేవంత్ అలాంటి ప్రయత్నం చేయడం గొప్పవిషయమన్నారు. మన సంస్కృతీ సాంప్రదాయాలను భవిష్యత్ తరాలకు చాటిచెప్పేందుకు ఇలాంటి సినిమాలు రావాలని, ఇలాంటి దర్శకులు మరింత మంది ఇండస్ట్రీకి అవసరమని తెలిపారు. ప్రముఖ కూచిపూడి నృత్యకారిణి సంధ్యా రాజు డబ్బు కోసం కాకుండా నృత్యంపై ఉన్న మక్కువతో ఈ సినిమాలో నటించి, నిర్మించారని అభినందించిన మెగస్టార్.. ఈ సినిమా తప్పకుండా ప్రేక్షకుల ఆదరణ పొందుతుందని ఆల్ ది బెస్ట్ చెప్పారు.