నెల్లూరులో కుండపోత వర్షం

దిశ, డైనమిక్ బ్యూరో : నైరుతి బంగాళాఖాతంలో ఏర్పడిన మిచౌంగ్ తుపాను ప్రభావం నెల్లూరు జిల్లాపై తీవ్ర ప్రభావం చూపిస్తోంది. తుఫాన్ ప్రభావం వల్ల నెల్లూరు జిల్లాలో భారీ వర్షాలు కురుస్తూ,గాలులు వీస్తున్నాయి. సముద్ర తీర ప్రాంత ప్రజలు భారీ వర్షం..ఈదురు గాలులతో తీవ్ర ఇబ్బందులు ఎదుర్కొంటున్నారు. దీంతో నెల్లూరు జిల్లా టీడీపీ నాయకులు, కార్యకర్తలు లోతట్టు ప్రాంతాల్లో పర్యటించాలని ప్రజలను సురక్షిత ప్రాంతాలకు తరలించాలని నెల్లూరు పార్లమెంట్ టీడీపీ అధ్యక్షులు అబ్దుల్ అజీజ్ పిలుపునిచ్చారు. మిచౌంగ్ తుపాను నేపథ్యంలో నెల్లూరు- కావలి వద్ద తీరం దాటనుండటం తో నెల్లూరు కు భారీ నుండి అతి భారీ వర్షాలు ఉండనున్నాయని తెలిపారు. నెల్లూరు జిల్లా వ్యాప్తంగా టీడీపీ నాయకులు, కార్యకర్తలు ప్రజలకు అందుబాటులో ఉండాలని, వారికి సహాయసహకారాలు అందించి అవసరం ఉన్న చోట్ల నిత్యావసర సరుకులు పంపిణీ చేయాలని నియోజకవర్గ ఇన్‌చార్జిలకు సూచించారు.