Ap News: 411 మంది ఉద్యోగుల కష్టం తీర్చిన సీఎం జగన్

దిశ, డైనమిక్ బ్యూరో: పోస్ట్ మెట్రిక్ ఎస్సీ హాస్టళ్లలో ఔట్ సోర్సింగ్ విధానంలో పని చేస్తున్న ఉద్యోగులు ఏళ్ల తరబడిగా ఎదుర్కొంటున్న వేతన సమస్యను రాష్ట్ర సాంఘిక సంక్షేమశాఖ మంత్రి మేరుగు నాగార్జున పరిష్కరించారు. ఇకపై వారి వేతనాలు సకాలంలో అందుకునేలా ఔట్ సోర్సింగ్ కార్పొరేషన్(ఆప్కాస్)కు వారి సేవలను అనుసంధానం చేశారు. రాష్ట్రంలో ఉన్న 160 పోస్ట్ మెట్రిక్ ఎస్సీ హాస్టళ్లలో వంట పని, పారిశుద్ధ్యం ఉద్యోగులుగా పని చేస్తున్న వారిలో 411 మందికి ప్రైవేటు సంస్థల ద్వారా వేతనాలను చెల్లించేవారు. అయితే ఈ విధానంలో ఆ ఉద్యోగులకు వేతనాలు అందడం ఆలస్యమౌతుండటంతో ఉద్యోగులు విధుల నుంచి తప్పుకుని వెళ్లిపోతున్నారు. దీంతో తమ వేతనాలు అందరితో పాటుగా సకాలంలో అందేలా చర్యలు తీసుకోవాలని అధికారులకు ఉద్యోగులు మొరపెట్టుకున్నారు.

దీంతో మంత్రి మేరుగు నాగార్జున సమస్య శాశ్వతం పరిష్కారానికి చర్యలు తీసుకోవాలని అధికారులను ఆదేశించారు. ఈ నేపథ్యంలోనే ప్రస్తుతం థర్డ్ పార్టీ విధానంలో పని చేస్తున్న ఈ ఉద్యోగుల సేవలను ప్రీ మెట్రిక్ ఎస్సీ హాస్టళ్లలో ఇది వరకే మంజూరైన పోస్టుల స్థానంలో ఉపయోగించుకోవాలని, వారి వేతనాలను ఆప్కాస్ ద్వారా ఆలస్యం లేకుండా ప్రతినెలా అందరితో పాటుగా చెల్లించాలని అధికారులు ప్రతిపాదించారు. మంత్రి మేరుగు నాగార్జున చొరవతో సీఎం వైఎస్ జగన్ ఆ ప్రతిపాదనపై ఆమోదముద్ర వేశారు. దీంతో ఈ ఉద్యోగులు ఇప్పటి వరకూ వేతనాల కోసం పడుతున్న ఇబ్బందులు పూర్తిగా తొలగిపోయాయని మంత్రి వెల్లడించారు. ప్రస్తుతం ఆప్కాస్‌కు అనుసంధానం చేసిన ఈ 411 మంది పోస్ట్ మెట్రిక్ ఎస్సీ హాస్టల్ ఉద్యోగుల్లో 37 మందిని శ్రీకాకుళం, 52 మందిని విజయనగరం, 17 మందిని విశాఖపట్నం, 120 మందిని తూర్పుగోదావరి, 82 మందిని కృష్ణా,62 మందిని ప్రకాశం, 41 మందిని అనంతపురం జిల్లాలకు చెందిన హాస్టళ్లకు కేటాయిస్తూ సాంఘిక సంక్షేమ అధికారులు ఉత్తర్వులు జారీ చేశారు.