లండన్‌లో తెలుగు విద్యార్థి మృతి

దిశ, దుగ్గొండి: ఉన్నత చదువుల కోసం విదేశాలకు వెళ్లిన విద్యార్థి భవిష్యత్తు అనారోగ్యంతో అర్ధంతరంగా ముగిసింది. వరంగల్ జిల్లా దుగ్గొండి మండలం నాచినపల్లి గ్రామానికి చెందిన దేవులపల్లి రమేష్ -రజిత ల కుమారుడు దేవులపల్లి ప్రణయ్ ఉన్నత చదువుల కోసం ఏడాదిన్నర క్రితం లండన్ వెళ్ళాడు. లండన్ లో ప్రణయ్ 20 రోజుల క్రితం అనారోగ్యానికి గురై ఆసుపత్రిలో చేరాడు. పరిస్థితి విషమించి ఆదివారం మృతి చెందినట్లు స్నేహితుల ద్వారా తల్లిదండ్రులకు సమాచారం అందింది. కుమారుడి మరణ వార్త విన్న తల్లిదండ్రులు రజిత రమేష్ లు కన్నీరుమున్నీరుగా విలపిస్తున్నారు. తమ కుమారుడి మృతదేహాన్ని ఇండియా కు తీసుకురావడానికి ప్రభుత్వం సహకరించాలని తల్లిదండ్రులు వేడుకుంటున్నారు.