ఎలుగుబంటి వెంబడించిన ఘటనలో మహిళ మృతి

దిశ, నేషనల్ బ్యూరో: బెలారస్‌కు చెందిన 31 ఏళ్ల మహిళ స్లోవేకియాలో ఎలుగుబంటి వెంబడించిన ఘటనలో చనిపోయింది. పూర్తి వివరాల్లోకి వెళితే టట్రాస్ పర్వత శ్రేణిలో ఆ మహిళ తన స్నేహితుడితో కలిసి నడుచుకుంటూ వెళ్తుండగా ఆకస్మాత్తుగా వారిని ఎలుగుబంటి వెంబడించింది. దీంతో వారు వెంటనే భయంతో చుట్టూ ప్రక్కన ఉన్నటువంటి దట్టమైన అడవిలోకి తలోదిక్కుగా పారిపోయారు.

ఆ తర్వాత కాసేపటికి ఆ వ్యక్తి ఆమె కోసం వెతకగా ఎక్కడ కనిపించలేదు. వెంటనే అక్కడి అధికారులకు సమాచారం అందించగా, వారు అడవిలో చుట్టూ ఉన్నటువంటి లోయలను వెతుకుతుండగా, బృందంలోని ఒక కుక్క అక్కడికి దగ్గరగా ఉన్నటువంటి లోయలో పడి ఉన్న ఆమె మృతదేహాన్ని కనిపెట్టింది. అయితే అధికారులు వెళ్లేసరికి మృతదేహం దగ్గరగా ఎలుగుబంటి ఉంది. దీంతో దానిని అక్కడి నుంచి తరమడానికి గన్‌ఫైరింగ్ చేయాల్సి వచ్చింది. అయితే ఆ మహిళను అడవి జంతువు చంపిందా లేక కిందపడి చనిపోయిందా అనేది తెలియలేదు. పూర్తి వివరాల కోసం దర్యాప్తు చేస్తున్నట్లు అధికారులు తెలిపారు.