వంతెనను ఢీ కొట్టి కూలీలు మృతి

దిశ, బోథ్: రోడ్డు ప్రమాదం ఇద్దరు వలస కూలీల ప్రాణాల్ని బలి తీసుకుంది. ఈ ఘటన ఆదిలాబాద్ జిల్లాలో చోటుచేసుకుంది. తవేరా వాహనంలో ఛత్తీస్‌గఢ్ నుంచి హైదరాబాద్‌కు వస్తున్న వలస కూలీలు శనివారం తెల్లవారుజామున ఇచ్చోడ మండలానికి చేరుకున్నారు. ఇచ్చోడ మీదుగా హైదరాబాద్‌ వైపు వెళ్తున్న సమయంలో ఇస్లాంనగర్‌ సమీపంలో ఓ వంతెనకు ఢీ కొట్టారు. ఈ ప్రమాదంలో కారులో ఉన్న ఇద్దరు కూలీలు మరణించారు. సమాచారం అందుకున్న పోలీసులు మృతదేహాలను కారులో నుంచి వెలికి తీయించారు. అనంతరం పోస్టుమార్టం నిమిత్తం ఆదిలాబాద్ రిమ్స్‌కు తరలించి.. కుటుంబ సభ్యులకు సమాచారం అందించారు.