Tollywood: గాలిలో పల్టీలు కొట్టిన కింగ్ నాగార్జున కారు.. వీడియో వైరల్

దిశ, డైనమిక్ బ్యూరో: టాలీవుడ్ మన్మథుడు, కింగ్ నాగార్జున కారు గాలిలో పల్టీ కొట్టిందంటూ ఓ వీడియో నెట్టింట చక్కర్లు కొడుతుంది. అయితే, ఇది ప్రమాదమా? లేక సినిమా షూటింగ్‌లో భాగమా అనేదానిపై ఇంకా క్లారిటీ లేదు. కొందరు ప్రమాదం అంటే మరికొందరు మాత్రం షూటింగ్‌లో భాగమే అంటూ కొట్టిపారేస్తున్నారు. పూర్తి వివరాల్లోకి వెళితే.. తమిళనాడు రాష్ట్రంలోని కూనూరులోని తుటుర్ మట్టం ప్రాంతంలో సోమవారం తేయాకు తోటల్లో కూలీలంతా కలిసి పని చేసుకుంటున్నారు. అయితే, ఒక్కసారిగా గట్టిగా శబ్దం వచ్చింది. ఏంటా అని చూస్తే ఓ కారు గాలిలో ఎగిరి పల్టీలు కొడుతూ వచ్చి పడింది. దీంతో ఒక్కసారిగా అక్కడున్నవారంతా భయాందోళనకు గురయ్యారు. ఈ ప్రమాదంలో కారులో ఉన్న వారికి సహాయం చేసేందుకు కొందరు వెళ్తే.. మరికొందరు అక్కడి నుంచి పారిపోయారు. అయితే, ఇదంతా నాగార్జున నటిస్తున్న సినిమాలోని ఓ సన్నివేశానికి సంబంధించిన షూటింగ్ అని తెలుసుకొని కూలీలంతా ఊపిరి పీల్చుకున్నారు.