శంషాబాద్ విమానాశ్రయానికి 'బెస్ట్ ఎయిర్‌పోర్ట్' అవార్డ్-2021
దిశ, శంషాబాద్: జిఎమ్మార్ హైదరాబాద్ అంతర్జాతీయ విమానాశ్రయం 2021 ఏడాదికి గాను ప్రతిష్టాత్మక ఎయిర్‌పోర్ట్ కౌన్సిల్ ఇంటర్నేషనల్, ఎయిర్‌పోర్ట్ సర్వీస్ క్వాలిటీ అవార్డును సాధించింది. హైదరాబాద్ అంతర్జాతీయ విమానాశ్రయం ఆసియా-పసిఫిక్ ప్రాంతంలో..15-25 మిలియన్ ప్యాసింజర్స్ విభాగంలో 'బెస్ట్ ఎయిర్ పోర్ట్ బై సైజ్ అండ్ రీజియన్' గా ఎంపికైంది. ఎయిర్ పోర్ట్ సర్వీస్ క్వాలిటీ సర్వే ద్వారా ప్రపంచంలోని ప్రముఖ విమానాశ్రయ ప్రయాణీకుల సేవలు, విమానాశ్రయం ద్వారా ప్రయాణిస్తున్నప్పుడు ప్రయాణీకుల సంతృప్తిని, అందించే సర్వీసులను పరిశీలిస్తారు.
ఎయిర్ పోర్ట్ సీఈఓ ప్రదీప్ పణికర్ మాట్లాడుతూ.. ఎయిర్ పోర్ట్ కౌన్సిల్ ఇంటర్నేషనల్ నిర్వహించే వార్షిక ఎయిర్ పోర్ట్ సర్వీస్ క్వాలిటీ సర్వేలో ప్రతి ఏడాదీ ప్రయాణికులు మమ్మల్ని ఉత్తమ విమానాశ్రయంగా ఎన్నుకోవడం మాకు దక్కిన గౌరవం అన్నారు. కొవిడ్ మహమ్మారి ప్రారంభమైనప్పటి నుంచి మేం ప్రయాణికుల కోసం విమానాశ్రయంలో అనేక కస్టమర్ ఫ్రెండ్లీ కార్యక్రమాలను చేపట్టి, విమాన ప్రయాణాన్ని సురక్షితం చేయడానికి కృషి చేశాం. ఈ ప్రయత్నంలో మాకు సహకరించిన మా భాగస్వాములందరికీ మా కృతజ్ఞతలు తెలిపారు. మా కార్యక్రమాలన్నిటిలోనూ అంతర్గతంగా ప్యాసింజర్ ఈజ్ ప్రైమ్ అనే మా లక్ష్యం కనిపిస్తుందిన్నారు.
ఎయిర్ పోర్ట్ కౌన్సిల్ ఇంటర్నేషనల్ వరల్డ్ డైరెక్టర్ జనరల్ లూయిస్ ఫిలిప్ డి. ఒలివెరా మాట్లాడుతూ.. జీఎంఆర్ హైదరాబాద్ అంతర్జాతీయ విమానాశ్రయానికి ఈ అవార్డు దక్కడం ప్రయాణికులకు మెరుగైన అనుభవం ఇవ్వడానికి వారు చేస్తున్న కృషికి నిదర్శనం. నేటి పరిస్థితుల్లో విమానాశ్రయాలన్నీ ప్రయాణికులకు మెరుగైన ప్రయాణ అనుభవాన్ని అందించడానికి చేస్తున్న కృషికి ఈ అవార్డులు నిదర్శనం అన్నారు.
