మరోసారి అన్నమయ్య కాంబినేషన్.. నాగార్జున 100వ చిత్రం
దిశ, సినిమా: ఏ హీరోకైనా తన కెరియర్‌లో 100వ చిత్రమంటే అంచనాలు మాములుగా ఉండవు. టాలీవుడ్‌లో ఇప్పటికే చిరంజీవి, బాల‌కృష్ణ వంద సినిమాలు కంప్లీట్ చేయగా.. త్వరలోనే కింగ్ నాగార్జున సైతం ఆ మైలురాయిని చేరుకోబోతున్నాడు. తన వందో సినిమా చాలా స్పెషల్‌గా ఉండాలని భావిస్తుండగా.. ఈ ప్రాజెక్ట్‌కు ద‌ర్శకుడు ఎవ‌ర‌నే ప్రశ్న ఇన్నాళ్లుగా అందరినీ ఆలోచనలో పడేసింది. అయితే ఈ ప్రెస్టీజియస్ చిత్రానికి సీనియర్ డైరెక్టర్ రాఘ‌వేంద్రరావు ఫిక్స్ అయిన‌ట్లు స‌మాచారం.
గ‌తంలో నాగార్జున, రాఘ‌వేంద్రరావు కాంబినేషన్లో ప‌లు విజ‌య‌వంత‌మైన సినిమాలు రూపొందిన విషయం తెలిసిందే. ప్రత్యేకించి ఈ కాంబినేషన్లో తెరకెక్కిన 'అన్నమయ్య, రామ‌దాసు' సినిమాలు ప్రేక్షకులను ఎంతగానో అల‌రించాయి. ఈ తరహాలోనే రాఘ‌వేంద్రరావు భారీతనం ఉట్టిపడే పవర్‌ఫుల్ స్క్రిప్ట్‌ సిద్ధం చేసిన‌ట్లు స‌మాచారం. ఇక క‌థ న‌చ్చడంతో నాగార్జున కూడా గ్రీన్‌సిగ్నల్ ఇచ్చినట్లు తెలుస్తుండగా.. త్వరలోనే ఈ సినిమాకు సంబంధించిన అధికారిక ప్రక‌ట‌న చేయనున్నట్లు స‌మాచారం.
