అదిరింద‌య్యా 'డిస్కో స్కూటర్!' అయితే, ఆనంద్ మహీంద్రా మెసేజ్ ఇది! (వీడియో)
దిశ, వెబ్‌డెస్క్ః బిలియనీర్ వ్యాపారవేత్త ఆనంద్ మహీంద్రా వ్యాపారంలో ఎంత హిట్టో, సోష‌ల్ మీడియాలో ఆయ‌న పెట్టే పోస్టులు కూడా అంతే హిట్ అవుతాయి. ఇండియాలో ఏదైనా ఇంట్రెస్టింగ్ అంశం క‌నిపించిందంటే ఏమాత్రం ఆల‌స్యం చేయ‌కుండా ప్ర‌జ‌ల‌తో పంచుకుంటారాయ‌న. వీటిల్లో ప్ర‌తిదీ ప్రజలకు స్ఫూర్తినిస్తుందన‌డంలో ఎలాంటి సందేహం లేదు. ఈ క్ర‌మంలోనే ఆనంద్ మ‌హీంద్ర తాజాగా ఓ అద్బుత‌మైన వీడియోను షేర్ చేసుకున్నారు. అన్ని వినోద అంశాల‌ను, జోడించి డిస్కో వెర్షన్‌గా మార్చిన ఒక స్కూటర్ సొబ‌గును చూపించే వీడియోను ట్వీట్ చేశారు. అయితే, ఈ డిస్కో స్కూటర్ ఎంత అందంగా ఉందో అంతే అంద‌మైన మాట‌ల‌ను కూడా ఆయ‌న అభిమానుల‌తో పంచుకున్నారు. "జీవితం మ‌నం ఎంత కావాల‌నుకుంటే అన్ని రంగులుగా, అంత వినోదాత్మకంగా ఉంటుంది. #భారతదేశంలో మాత్రమే" అని ఆనంద్ మహీంద్రా క్యాప్షన్‌లో రాశారు. 298k వ్యూవ్స్‌, 15k లైక్‌లు వచ్చిన ఈ వీడియోలో కస్టమైజ్ చేసిన స్కూటర్‌ని పెట్రోల్ పంప్ వద్ద పార్క్ చేసి ఉంటుంది. దాని ముందు భాగంలో ఉన్న చిన్న టీవీలో రాజేష్ ఖన్నా పాడిన "చుప్ గయే సారే నజారే.." పాట ప్లే అవుతుంటుంది. ఈ స్కూటర్ అంద‌మైన రంగుల‌తో మిరిమిట్లు గొలిపై లైట్లు, మెరిసే పూసలతో నిండి, సంతోషానికి అడ్ర‌స్‌లా కనిపిస్తుంది.
