TDP తెలంగాణ అధ్యక్షుడు కాసాని కొత్త నినాదం

దిశ, తెలంగాణ బ్యూరో: రాబోయే ఎన్నికల్లో టీడీపీకి అవకాశం ఇవ్వండి.. అభివృద్ధి ఏంటో చూపుతామని పార్టీ రాష్ట్ర అద్యక్షుడు కాసాని జ్ఞానేశ్వర్ అన్నారు. రాష్ట్రంలోని 119 అసెంబ్లీ స్థానాల్లో టీడీపీ పోటీ చేస్తుందని తెలిపారు. ఆదివారం ఆయన మీడియాతో మాట్లాడారు. బీసీ వర్గాల అభ్యున్నతికి నిరంతరం కృషి చేస్తున్న పార్టీ టీడీపీ అన్నారు. రాబోయే ఎన్నికల్లో పార్టీ కీలక పాత్ర పోషించబోతుందన్నారు. పార్టీకి పూర్వ వైభవం వస్తుందని, నాయకులు మాత్రమే స్వార్ధరాజకీయాల కోసం పార్టీలు మారారని, కానీ కార్యకర్తలు అలాగే ఉన్నారన్నారు.

టీడీపీ రాష్ట్రంలో బలమైన ఓటుబ్యాంకు ఉందన్నారు. టీడీపీ పాలనలో చేసిన అభివృద్ధిని గుర్తించి అసెంబ్లీ ఎన్నికల్లో పార్టీ అభ్యర్థులకు ప్రజలు గెలిపించాలని విజ్ఞప్తి చేశారు. మహేశ్వరం నుంచే ఎన్నికల ప్రచారానికి శ్రీకారం చుట్టబోతున్నామని, వచ్చే 15న జాతీయ జెండా ఎగరేసి, 16న బస్సు యాత్రను కార్యక్రమం చేపట్టేందుకు కసరత్తు జరుగుతున్నట్లు తెలిపారు. త్వరలోనే బస్సుయాత్ర రూట్ మ్యాప్‌ను ప్రకటిస్తామని వెల్లడించారు. కాగా, ఒక్క ఛాన్స్ ఇవ్వండి అంటూ టీడీపీ అధ్యక్షుడు కాసాని ఎత్తుకున్న నినాదం రాష్ట్రంలో తీవ్ర చర్చనీయాంశమైంది.