‘ఉగ్ర’ కుట్ర కేసులో మరో ఇద్దరి అరెస్ట్..

దిశ, తెలంగాణ క్రైం బ్యూరో: ‘ఉగ్ర’ కుట్ర కేసులో భోపాల్​ యాంటీ టెర్రరిస్ట్​ స్క్వాడ్​ అధికారులు రాష్ట్ర కౌంటర్​ ఇంటెలిజెన్స్ ​పోలీసులతో కలిసి సోమవారం మరో ఇద్దరిని అరెస్టు చేశారు. ఇటీవల హైదరాబాద్ ​వచ్చిన యాంటీ టెర్రరిస్ట్ ​స్క్వాడ్​ అధికారులు మన పోలీసులతో కలిసి హిజ్బుత్​ తెహ్రీర్​ హైదరాబాద్ ​మాడ్యూల్​కు చెందిన ప్రధాన సూత్రధారి యాసిన్​తోపాటు మరో నలుగురిని అరెస్టు చేసిన విషయం తెలిసిందే. వీరిని భోపాల్​ కోర్టులో హాజరుపరిచి రిమాండ్​కు తరలించారు. కాగా, రెండు రోజుల క్రితం కోర్టు అనుమతితో ఈ అయిదుగురిని కస్టడీకి తీసుకున్న యాంటీ టెర్రరిస్ట్​ స్క్వాడ్​ అధికారులు జరిపిన విచారణలో పాతబస్తీ చాంద్రాయణగుట్ట ప్రాంతంలోని బాబానగర్​లో మరికొందరు ఉన్నట్టుగా వెల్లడైంది.

ఈ క్రమంలో కస్టడీకి తీసుకున్న నిందితులను వెంటబెట్టుకుని హైదరాబాద్​ చేరుకున్న యాంటీ టెర్రరిస్ట్​ స్క్వాడ్​ అధికారులు రాష్ర్ట కౌంటర్​ ఇంటెలిజెన్స్​ పోలీసులతో కలిసి సోమవారం మధ్యాహ్నం బాబానగర్ ​వెళ్లారు. అరెస్టయిన నిందితులు చూపించిన ఇండ్ల నుంచి మరో ఇద్దరిని అదుపులోకి తీసుకున్నారు. ట్రాన్సిట్​వారెంట్​పై ఈ ఇద్దరిని కూడా భోపాల్​తరలించనున్నారు. దానికి ముందు ఇంకా ఎవరైనా ఉగ్రవాదులు హైదరాబాద్​లో ఉన్నారా? అన్న విషయమై నిందితులను ప్రశ్నించనున్నారు. ఉన్నట్టయితే వారిని కూడా అరెస్టు చేసి తీసుకెళ్లాలని భావిస్తున్నారు.