ఫతేపూర్ లో టీఆర్ఎస్ అభ్యర్థి జీవన్ రెడ్డికి నిరసన సెగ...
దిశ, ఆర్మూర్ : నిజామాబాద్ జిల్లా ఆర్మూర్ నియోజకవర్గంలోని ఆర్మూర్ మండలం ఫతేపూర్ గ్రామంలో సోమవారం రాత్రి ఆర్మూర్ బీఆర్ఎస్ ఎమ్మెల్యే అభ్యర్థి ఆశన్న గారి జీవన్ రెడ్డి ఎన్నికల ప్రచారం నిర్వహించారు. దీనికి ముందస్తుగా ఫతేపూర్ గ్రామానికి చెందిన కాంగ్రెస్ నాయకులు బీఆర్ఎస్ పార్టీ గతంలో ఇచ్చిన హామీలను పేర్కొంటూ గ్రామ ఎంట్రన్స్ లో ఒక ఫ్లెక్సీలు ఏర్పాటు చేసి నిరసన తెలిపారు. దీంతో పాటు కాంగ్రెస్ నాయకులు ప్లకార్డులను ప్రదర్శించారు. సమస్యలతో కూడిన ఫ్లెక్సీని కాంగ్రెస్ నాయకులు ఏర్పాటుచేసి ఫతేపూర్ గ్రామం అని పెట్టడం పట్ల ఫతేపూర్ గ్రామానికి చెందిన బీఆర్ఎస్ నాయకులు నిలదీశారు.
ఫతేపూర్ గ్రామ కాంగ్రెస్ నాయకులని పెట్టుకోవాలి గాని ఫతేపూర్ గ్రామం అని పెట్టడం ఏంటని వాదనకు దిగారు. ఈ వాదనలో కాంగ్రెస్ నాయకులు ఏర్పాటు చేసిన ఫ్లెక్సీ పడిపోయింది. కాంగ్రెస్ పార్టీ నాయకులు ఫ్లెక్సీ పెట్టాలనుకుంటే ఫతేపూర్ గ్రామం అని పేరు పెట్టకుండా ఫతేపూర్ కాంగ్రెస్ పార్టీ నాయకులను పెట్టుకోవాలని బీఆర్ఎస్ నాయకులు హితవు పలికారు. సమస్యల పై ప్రశ్నిస్తే బీఆర్ఎస్ నాయకులు దౌర్జన్యానికి దిగుతున్నారని కాంగ్రెస్ నాయకులు పేర్కొన్నారు.
