రోడ్డు ప్రమాదంలో వ్యక్తి దుర్మరణం

దిశ, అర్వపల్లి (జాజిరెడ్డిగూడెం): జాజిరెడ్డిగూడెం మండలం సీతారాంపురంలో గుర్తు తెలియని వాహనం ఢీకొని ఓ వ్యక్తి మృతి చెందాడు. అర్వపల్లి ఎస్ఐ బాలకృష్ణ తెలిపిన వివరాల ప్రకారం..గైగుళ్ళ వీరభద్రయ్య (53) గురువారం రాత్రి తన సొంత గ్రామం వెలుగుపల్లి నుంచి సూర్యాపేట వైపు మోటార్ సైకిల్ పై వెళ్తున్నాడు. మార్గమధ్యలో జాజిరెడ్డిగూడెం మండలం సీతారాంపురం వద్ద బైక్ వెనుక నుంచి గుర్తు తెలియని వాహనం ఢీకొట్టడంతో..అక్కడిక్కడే మృతి చెందినట్లు తెలిపారు. గమనించిన స్థానికులు పోలీసులకు సమాచారం అందించారు. దీంతో సంఘటనా స్థలాన్ని పోలీసులు సందర్శించి, మృతదేహాన్ని తుంగతుర్తి ఏరియా ఆసుపత్రికి తరలించినట్లు తెలిపారు. మృతుడి కుమారుడు సతీష్ ఫిర్యాదు మేరకు కేసు నమోదు చేసి..దర్యాప్తు చేస్తున్నట్లు ఎస్ఐ తెలిపారు. కాగా మృతుడికి ఇద్దరు కుమారులు, ఒక కూతురు ఉన్నారు.