శ్రీరామనవమి నందిపేట్ శోభాయాత్రలో అపశృతి..
దిశ, ఆర్మూర్ : శ్రీ రామనవమి పర్వదినం సంధర్భంగా ఆర్మూర్ నియోజకవర్గంలోని నందిపేట్ మండల కేంద్రంలో గురువారం నిర్వహించిన శోభాయాత్రలో అపశృతి చోటు చేసుకుంది. ఊరేగింపు చేస్తున్న ట్రాక్టర్ కు 11 కేవీ విద్యుత్ తీగలు తగలడంతో ట్రాక్టర్ మొత్తం గురువారం రాత్రి విద్యుత్ ఘాతానికి గురైంది. ఈ ఘటనలో బీజేపీ మాజీ మండల అధ్యక్షులు, నందిపేట్ ఎంపీటీసీ ఎలిగేటి రాజు, కాదరి శ్రీనివాస్, వెంకట నారాయణ, ఒక చిన్నారి వర్ధన్ బాబుకు గాయాలు అయ్యాయి. దీంతో వారిని నందిపేట మండల కేంద్రంలో గల సుఖీభవ హాస్పిటల్ కు చికిత్స నిమిత్తం తరలించారు.
విద్యుత్ఘాత ఘటనలో గాయానికి గురైన చిన్నారి వర్ధన్ బాబుని జిల్లా కేంద్రంలోని ఆద్య పిల్లల ఆసుపత్రికి మెరుగైన చికిత్స నిమిత్తం నందిపేట్ నుంచి తరలించారు. విషయం తెలుసుకొని గురువారం రాత్రి నందిపేట్ మండల కేంద్రంలో వారు చికిత్స పొందుతున్న సుఖీభవ ఆసుపత్రికి వెళ్లి వారి ఆరోగ్య పరిస్థితిని తెలుసుకొని వారికి మెరుగైన చికిత్స అందేలా చూడాలని డాక్టర్లను కోరిన బిజెపి ఆర్మూర్ నియోజకవర్గ నాయకులు ప్రొద్దుటూరి వినయ్ రెడ్డి కోరారు.
