రోడ్డు పక్కన ప్రమాదకరంగా బావి

దిశ,భూదాన్ పోచంపల్లి : భూదాన్ పోచంపల్లి పురపాలక కేంద్రం నుంచి జగత్ పల్లి వెళ్లే ప్రధాన రహదారి పక్కన ప్రమాదకరంగా బావి ఉంది. నిత్యం ఈ దారిగుండా వాహనదారులు, వ్యవసాయ కూలీలు, వివిధ గ్రామాల ప్రజలు మండల కేంద్రానికి రాకపోకలు నిర్వహిస్తుంటారు. ఈ బావి మూలమలుపుపై ఉండడంతో..అటుగా వెళ్లే ప్రయాణికులు బావిలో పడే అవకాశాలు అనేకంగా ఉన్నాయి. రాత్రి వేళలో ఈ దారి వెంట ప్రయాణించాలంటే కత్తి మీద సాము లాంటిదేనని చెప్పొచ్చు. ఈ బావి రోడ్డుకు అతి దగ్గరగా ఉండడంతో..హెచ్చరిక బోర్డులు కూడా లేకపోవడం వల్ల ప్రమాదం జరిగే అవకాశాలు ఉన్నాయని ప్రయాణికులు వాపోతున్నారు. ఏదైనా ప్రమాదం జరిగి ప్రాణం పోతే కానీ..పట్టించుకోరా అని పలువురు ప్రశ్నిస్తున్నారు. ఇప్పటికైనా అధికారులు బావిని పూడ్చివేయించాలని స్థానికులు కోరుతున్నారు.