వేర్వేరు ఘటనల్లో ఇద్దరి మృతి
దిశ,ఎర్రవల్లి/ఇటిక్యాల : ఇటిక్యాల పోలీస్ స్టేషన్ పరిధిలో వేర్వేరు సంఘటనల్లో శనివారం ఇద్దరు మృతి చెందారు. ఇటిక్యాల ఎస్ఐ వెంకటేష్ వివరాల ప్రకారం.. షాబాద్ గ్రామానికి చెందిన తెలుగు నాగన్న (86) ఎర్రవల్లి చౌరస్తా నుంచి షాబాద్ కు ఆటోలో వెనక కూర్చుని ప్రయాణిస్తున్నాడు. దీంతో మునగాల గ్రామ శివారులో తన చెప్పు కిందపడగా..దానిని అందుకునే ప్రయత్నంలో ప్రమాదవశాత్తు కింద పడి తలకు తీవ్ర గాయాలయ్యాయి. దీంతో గద్వాల ప్రభుత్వ ఆసుపత్రికి తరలించగా..అప్పటికే వ్యక్తి మృతి చెందినట్లు డాక్టర్లు తెలిపారు. మృతుడి కుమారుడు రాముడు ఫిర్యాదు మేరకు కేసు నమోదు చేసినట్లు ఎస్సై తెలిపారు. మరో ఘటనలో హైదరాబాదు నుంచి కర్నూల్ బస్సులో ప్రయాణిస్తున్న గుర్తుతెలియని ప్రయాణికుడు (65) ఇటిక్యాల స్టేజి దగ్గర బస్సుదిగి కాలకృత్యాలు తీర్చుకుంటున్న సమయంలో అక్కడే కిందపడి మరణించాడని స్థానికులు తెలిపారు. మృతుడి వివరాలు తెలిసినవారు ఇటిక్యాల ఎస్ఐ 8712670282 నంబర్ సంప్రదించాలని ఎస్సై తెలిపారు.
