Super star krishna : తన గెస్ట్ హౌస్ ను జితేందర్ రెడ్డికి ఇచ్చారు.. ఎందుకో తెలుసా?
దిశ ప్రతినిధి, మహబూబ్ నగర్: సూపర్ స్టార్ కృష్ణ తన గెస్ట్ హౌస్ ను బీజేపీ నేత జితేందర్ రెడ్డికి ఇచ్చారు. దాదాపు రెండు దశాబ్దాల కిందట హీరో కృష్ణ ఊటీలోని తన గెస్ట్ హౌస్ ను జితేందర్ రెడ్డికి ఇచ్చారు. అయితే మంగళవారం సూపర్ స్టార్ కృష్ణ దివంగతులు కావడంతో ఈ విషయంలో వెలుగులోకి వచ్చింది. స్వయంగా జితేందర్ రెడ్డి హీరో కృష్ణతో తనకున్న అనుబంధాన్ని గుర్తు చేసుకున్నారు. ఇక పూర్తి వివరాల్లోకి వెళ్తే.. కొన్నేళ్ల కిందట హీరో కృష్ణ, జితేందర్ రెడ్డి, మరికొంతమంది మిత్రులు కలిసి పలు వ్యాపారాలు చేస్తుండేవారు. ఈ క్రమంలోనే కృష్ణ, జితేందర్ రెడ్డి కుటుంబాల మధ్య బంధం పెరిగింది.
ఇవి కూడా చదవండి: ఆస్తుల్లో కొడుకులకు చిల్లిగవ్వ ఇవ్వని super star krishna..? మరి ఎవరికి ఇచ్చినట్లు..?
గతంలో జితేందర్ రెడ్డి ప్రస్తుత మణికొండలో ప్లానెట్ 10 రిసార్ట్స్ బిజినెస్ నిర్వహించేవారు. అయితే సూపర్ స్టార్ కృష్ణ ఆ స్థలం తనకిమ్మని కోరడంతో జితేందర్ రెడ్డి ఆ స్థలాన్ని కృష్ణకు ఇచ్చేశారు. అందుకు బదులుగా కృష్ణ తనకు ఊటీలో ఉన్న గెస్ట్ హౌస్ ను జితేందర్ రెడ్డికి ఇచ్చారు. కృష్ణ తన సినిమాలను ఎక్కువగా ఊటీలోనే షూటింగ్ చేసేవారు. దాదాపు ప్రతి వేసవిలో ఆయన తన కుటుంబ సభ్యులతో అక్కడే గడుపుతూ ఉండేవారు. అంత ఇష్టమైన గెస్ట్ హౌస్ ను కృష్ణ తన ఫ్రెండ్ జితేందర్ రెడ్డికి ఇవ్వడం వారి మధ్య ఉన్న అనుబంధానికి గుర్తుగా నిలుస్తోంది. కాగా కృష్ణ తో తీసుకున్న ఆ గెస్ట్ హౌస్ కు జితేందర్ రెడ్డి మరిన్ని మెరుగులు దిద్దించి తన ఆధీనంలోనే ఉంచుకున్నారు. స్నేహానికి, పట్టుదల, నిజాయితీకి మారుపేరుగా నిలిచిన కృష్ణ ఈ లోకాన్ని విడిచి వెళ్లడం బాధాకరమని ఈ సందర్భంగా జితేందర్ రెడ్డి అన్నారు.
