వాహనం ఒకరిది.. ఫోటో మరొకరిది

దిశ, అశ్వారావుపేట : తెలంగాణ అసెంబ్లీ ఎన్నికలకు కాంగ్రెస్ పార్టీ విడుదల చేసిన ఎమ్మెల్యే అభ్యర్థుల తొలి జాబితాలో భద్రాద్రి కొత్తగూడెం జిల్లా అశ్వారావుపేట అభ్యర్థిని ప్రకటించినప్పటికీ.. టికెట్ రేసులో ఉన్న పొంగులేటి టీం అభ్యర్థి జారె ఆదినారాయణ తన ఎన్నికల ప్రచార వాహనాన్ని సిద్ధం చేసి.. తోటి ఆశావహులను ఉలిక్కిపడేలా చేశారు. అయితే ఇప్పుడు అదే ప్రచార వాహనం పై మరో ఆశావహులు సున్నం నాగమణి ఫోటో వాట్సాప్ లో దర్శనం ఇవ్వడం కాంగ్రెస్ వర్గాల్లో అయోమయానికి కారణమయ్యింది.

జారెకు టికెట్ ఖరారు అయిందన్న విశ్వసనీయమైన సమాచారంతోనే ఈ విధంగా ప్రచార వాహనాన్ని సిద్ధం చేసుకున్నారనుకున్నారు. ఇప్పుడు అదే వాహనం పై సున్నం నాగమణి ఫోటో ఉండడంతో.. టికెట్ల కేటాయింపులలో మార్పులు జరిగి ఉండొచ్చు. అందుకే ఇలా సొంతం చేసుకున్నారని విభిన్న ఊహాగానాలు మొదలయ్యాయి. అయితే జారె ప్రచార వాహనం పై అతని స్థానంలో సున్నం నాగమణి ఫోటోని మార్ఫింగ్ చేసినట్లుగా తెలుస్తోంది. ఆమె అభిమానులో లేదా గిట్టని వారు ఈ విధంగా చేసి ఉండొచ్చని భావిస్తున్నారు. మొత్తానికి ఏది నిజమో ఏది అబద్దమో తెలియని పరిస్థితిలో సామాన్యులు ఉన్నారు.