ట్రాన్స్ జెండర్‌ను పెళ్లి చేసుకున్న యువకుడు (వీడియో)
దిశ, జమ్మికుంట: చూపులు కలిశాయి, మనసులూ కలిశాయి, కలిసి జీవనం సాగించాలనుకున్నారు. మూడు ముళ్ల బంధంతో ఎడడుగులు నడిచి నూతన జీవితంలోకి అడుగు పెట్టారు. ఇదేదో సాధారణ వ్యక్తులకు చెందిన వివాహం అయితే అంత ప్రత్యేకత ఉండేది కాదు. ఓ ట్రాన్స్ జెండర్ ను వివాహం చేసుకున్న ఆ వ్యక్తి ఆమెకు బాసటగా నిలుస్తున్నాడని అనుకోవడం లేదు. కొత్త జీవితంలో కొంగొత్త ఆశలతో తన జీవిత భాగస్వామి అయిన ఆమె దిశానిర్దేశం చేసిన విధంగా ముందుకు సాగుతానని ప్రకటించాడు. కరీంనగర్ జిల్లా జమ్మికుంట మండలంలో శుక్రవారం ఒక్కటైన ఈ జంటకు సంబందించిన వివరాలు. వీణవంకకు చెందిన దివ్య కొంత కాలంగా జమ్మికుంట పట్టణంలో జీవనం సాగిస్తున్నది. గతంలో జగిత్యాలలో నివాసం ఉన్నప్పుడు ట్రాన్స్ జెండర్ గా మారిపోగా అక్కడే పరిచయం అయిన అర్షద్ తనను పెళ్లి చేసుకుంటానని రెండు మూడు సార్లు ప్రపోజ్ చేశాడు. అయితే మొదట్లో నిరాకరించిన దివ్యను ఒప్పించేందుకు గురువారం జమ్మికుంటకు వచ్చిన అర్షద్ హర్షిత్ గా మారి ఆమె మెడలో మూడు ముళ్లు వేశాడు. దివ్య సర్జరీ కూడా చేయించుకున్న తరువాతే హర్షిత్ ప్రపోజల్ కు ఓకే చెప్పేసింది. కారు డ్రైవర్ గా జీవనం సాగిస్తున్న హర్షిత్ ఇక ముందు దివ్య చెప్పినట్టుగా నడుచుకుంటూ కొత్త జీవితాన్ని ప్రారంభిస్తున్నానన్నాడు. వివాహ బంధంతో ఒక్కటైన తాము ఆదర్శవంతమైన జీవితం గడుపుతామని దివ్య పేర్కొన్నది. శుక్రవారం జమ్మికుంటలో ఒక్కటైన ఈ జంట ఇల్లంతకుంట రామాలయంలో పూజలు చేశారు.
