'మా వాళ్లను బతిమిలాడుకుంటా.. దయచేసి మీరు వెళ్లిపోండి'
దిశ ప్రతినిధి, కరీంనగర్: రాజన్న సిరిసిల్ల జిల్లాలో డబుల్ బెడ్రూం లబ్ధిదారుల ఎంపిక ప్రక్రియపై స్థానికుల నిరసనల సెగలు ఆగడం లేదు. ఇప్పటికే పలుచోట్ల లబ్ధిదారుల ఎంపికలో అవకతవకలు జరిగాయని ఆందోళనలు వ్యక్తం కాగా, తాజాగా శుక్రవారం జిల్లా కేంద్రమైన సిరిసిల్లలోనే నిరసన వ్యక్తమైంది. పట్టణంలోని 30వ వార్డులో డబుల్ బెడ్రూం లబ్ధిదారుల ఎంపికలో భాగంగా అధికారులు డ్రా తీశారు. ఈ సందర్భంగా డ్రాలో తమ పేర్లు లేవంటూ కొందరు నిరసన తెలిపారు. మరికొందరు మహిళలు జాబితాలో అనర్హుల పేర్లు చేర్చారంటూ ఆగ్రహం వెలిబుచ్చారు. అన్నింటా అర్హత ఉన్న తమ పేర్లు జాబితాలో లేకపోవడం ఏంటని ప్రశ్నించారు. అధికారులు మాత్రం మహిళల అభ్యంతరాలను పట్టించుకోకుండానే డ్రా ప్రక్రియను కొనసాగించారు. అర్హులకు రాకుండా, అనర్హులు పేర్లు డ్రాలో వచ్చాయని బాధితులు ఆగ్రహం వ్యక్తం చేశారు. స్థానిక కౌన్సిలర్, మున్సిపల్ వైస్ చైర్మన్ అయిన మంచె శ్రీనివాస్‌ను నిలదీశారు. మహిళలను శాంతింపజేయడానికి మంత్రి కేటీఆర్‌తో మాట్లాడి మిగతా వారికి కూడా ఇళ్ళు కట్టించే ఏర్పాటు చేస్తానని వైస్ చైర్మన్ హామీ ఇచ్చారు. ''నా వార్డు ప్రజలను బతిమిలాడుకుంటా, మీ దండం పెడతాం మీరు వెళ్ళిపొండి'' అంటూ వైస్ చైర్మన్ విలేకరులను ప్రాధేయ పడడం కొసమెరుపు.
