గోల్డ్ వర్క్ షాపులలో చోరీ..
దిశ, మల్లాపూర్ : జగిత్యాల జిల్లా మల్లాపూర్ మండల కేంద్రంలో గోల్డ్ వర్క్ షాపులలో దొంగతనం సంఘటన కలకలం రేపింది. మల్లాపూర్ మండల కేంద్రంలో రెండు గోల్డ్ వర్క్ షాపులతో పాటు మోటార్ వైండింగ్ షాపులో గుర్తు తెలియని వ్యక్తులు చోరీకి పాల్పడ్డారు. శనివారం తెల్లవారు జామున గోల్డ్ వర్క్ షాప్ లలో తాళాలు పగలగొట్టి దొంగలు చోరీకి తెగబడ్డారు.
మల్లాపూర్ మండల కేంద్రంలోని ప్రధాన కూడలిలో సీసీ కెమెరాలు పనిచేయడం లేదని స్థానికులు ఆరోపిస్తున్నారు. స్థానికులు తెలిపిన వివరాల ప్రకారం సుమారు 40 గ్రాముల బంగారం 50 తులాల వెండి దొంగతనం జరిగినట్టు ఆరోపిస్తున్నారు. ఈ సంఘటనతో వ్యాపార వర్గాలు ఆందోళన చెందుతున్నాయి. సంఘటనా స్థలానికి చేరుకున్న పోలీసులు క్లూస్ టీంతో వివరాలు సేకరిస్తున్నారు. ప్రస్తుతం చోరీకి పాల్పడిన నిందితుల కోసం పోలీసులు గాలిస్తున్నారు. సంఘటనకు సంబంధించి పూర్తి వివరాలు తెలియాల్సి ఉంది.
