బీజేపీ గ్రామ నాయకుడిపై దాడి..
దిశ, జగిత్యాల కలెక్టరేట్: జగిత్యాల రూరల్ మండలం తిమ్మాపూర్ గ్రామానికి చెందిన బీజేపీ కార్యకర్త దుబ్బాక రమేష్ పై గుర్తు తెలియని దుండగులు దాడికి పాల్పడ్డారు. మార్నింగ్ వాకింగ్ చేసేందుకు వచ్చిన రమేష్ పై మోతె బైపాస్ వద్ద ఈ దాడి జరిగింది. బాధితుడు తెలిపిన వివరాల ప్రకారం వాకింగ్ చేస్తున్న సమయంలో కారులో వచ్చిన నలుగురు గుర్తు తెలియని వ్యక్తులు మాస్క్ వేసుకొని కత్తులు రాడ్లతో గాయపరిచినట్లు తెలిపాడు. ఎందుకు కొడుతున్నారని అడిగిన చెప్పకుండా విచక్షణ రహితంగా దాడి చేసిన దుండగులు తాను స్పృహ కోల్పోయిన వెంటనే అక్కడి నుంచి పరారైనట్లు వివరించాడు. స్థానికుల సహాయంతో జగిత్యాల ప్రభుత్వ ఆసుపత్రికి వచ్చిన రమేష్ కు వైద్యులు చికిత్స అందిస్తున్నారు. ఇదిలా ఉండగా ఓ ముగ్గురు వ్యక్తులు కావాలనే ఉద్దేశపూర్వకంగా తనపై దాడికి పాల్పడినట్లు బాధితుడు రమేష్ చెబుతున్నప్పటికీ ఇందుకు సంబంధించిన పూర్తి వివరాలు తెలియాల్సి ఉంది.
