ఇకనైనా సీఎం అని గుర్తుంచుకుంటే మంచిది.. రేవంత్ మార్చురీ వ్యాఖ్యలపై హరీష్ రావు ఫైర్
దిశ, వెబ్ డెస్క్: పొలిటికల్ మెచూరిటీ(Political Maturity) లేకనే సీఎం మార్చురీ వ్యాఖ్యలు (Mortuary Comments) చేస్తు్న్నారని, ప్రతిపక్ష నేతల మరణాన్ని కోరుకుంటున్న నీచ బుద్ది సీఎం రేవంత్ రెడ్డిది అని మాజీమంత్రి, బీఆర్ఎస్ నేత హరీష్ రావు (BRS Leader Harish Rao) మండిపడ్డారు. మాజీ సీఎం కేసీఆర్ (KCR) పై రేవంత్ రెడ్డి (CM Revanth Reddy) చేసిన వ్యాఖ్యల పట్ల ట్విట్టర్ వేదికగా స్పందిస్తూ.. సీఎంపై విరుచుకుపడ్డారు. ఈ సందర్భంగా ఆయన.. బీఆర్ఎస్ లక్షా 62 వేల ఉద్యోగాలు ఇస్తే, కాంగ్రెస్ 5 వేల ఉద్యోగాలు ఇవ్వలేదని, ప్రభుత్వ కార్యక్రమాలను సీఎం రేవంత్ రెడ్డి రాజకీయ విమర్శలకు వాడుకోవడం ఆయన దుస్థితి కి నిదర్శనమని అన్నారు. అలాగే ఉద్యోగ నియామక పత్రాలిచ్చే కార్యక్రమంలో రేవంత్ రెడ్డి తన ఉన్మాద ప్రవృత్తిని మరోసారి బయట పెట్టుకున్నారని సంచలన వ్యాఖ్యలు చేశారు.
కేసీఆర్ ఇచ్చిన ఉద్యోగ నోటిఫికేషన్లకు నియామక పత్రాలు ఇచ్చుకుంటూ ఇంకెంత కాలం డప్పు కొట్టుకుంటావు రేవంత్ రెడ్డి? అంటూ.. ఏడాదిన్నరగా నువ్వు ఇస్తున్న నియామక పత్రాలు అన్ని కేసీఆర్ గారు నోటిఫికేషన్లె కదా అని ఎద్దేవా చేశారు. ఈరోజు కూడా కేసీఆర్ ప్రభుత్వ హయంలో ఇచ్చిన పాలిటెక్నిక్ లెక్చరర్, జూనియర్ లెక్చరర్ నోటిఫికేషన్లకు, పెట్టిన పరీక్షలకు నియాక పత్రాలు ఇచ్చారని, కేసీఆర్ హయంలో మొదలై చివరి దశకు వచ్చిన ఉద్యోగ నియామకాల ప్రక్రియను పూర్తి చేసి జబ్బలు చరచుకుంటే బొప్పి కట్టడం తప్ప ఒరిగేదేమి ఉండదని దుయ్యబట్టారు. తొమ్మిదిన్నర ఏళ్ల కాలంలో బీఆర్ఎస్ ప్రభుత్వం లక్షా 62 వేల ప్రభుత్వ ఉద్యోగాలు ఇచ్చింది వాస్తవమని, ఏడాదిన్నర కాలంలో నోటిఫికేషన్ల ద్వారా రేవంత్ రెడ్డి ఇచ్చిన ఉద్యోగాలు 5, 6 వేలు మించ లేదనేది వాస్తవమని చెప్పారు.
95% ఉద్యోగాలు స్థానిక యువతకు దక్కేలా కేసీఆర్ రాష్ట్రపతి ఉత్తర్వులు సాధించారని, ఎన్నికల ప్రచారంలో నిరుద్యోగులను మభ్యపెట్టి అధికారంలోకి వచ్చిన కాంగ్రెస్ పార్టీ, హామీల అమలులో అట్టర్ ఫ్లాప్ అయ్యిందని విమర్శించారు. ఇక ఏడాదికి రెండు లక్షల ఉద్యోగాలు బోగస్ అయ్యిందని, జాబ్ క్యాలెండర్ జాబ్ లెస్ క్యాలెండర్ అయిందని, నిరుద్యోగ భృతి తీవ్ర నిరాశను మిగిల్చిందని అన్నారు. రేవంత్ లాంటి కుసంస్కారి కేసీఆర్ పై చిల్లర విషయాలు చెబితే నమ్మడానికి ఉద్యోగాలు పొందిన వారు అమాయకులు కారని, 55 వేల ఉద్యోగాలిచ్చామని చెప్పిన అబద్ధాన్నే ప్రతి చోటా చెబుతూ రేవంత్ తుపాకీ రాముడిని మించిపోయారని ధ్వజమెత్తారు. పాలన చేతకాక రేవంత్ 'పరనింద''నే పనిగా పెట్టుకున్నారని, సీఎం గా వచ్చిన అవకాశాన్ని రాష్ట్రం బాగు కోసం వాడక తన పదవి ఉంటుందో ఊడుతుందోనని అభద్రతా భావంతో మాట్లాడుతున్నారని వ్యాఖ్యానించారు.
తన పార్టీలోని అంతర్గత కుమ్ములాటలతో సతమతమవుతూ బీఆర్ఎస్ పై నెపం నెట్టి సానుభూతి రాజకీయానికి తెర లేపుతున్నారని, హంతకుడు సంతాప సభ పెట్టినట్టు ఉంది రేవంత్ తీరు అని ఫైర్ అయ్యారు. అలాగే రాష్ట్రానికి కేన్సర్ సోకిందంటూ రేవంత్ రెడ్డి ఓ ఉన్మాదిలా మాట్లాడుతున్నారని, తన చేతకాని తనాన్ని రాష్ట్ర ప్రజలకు ఆపాదించే ప్రయత్నం చేస్తున్నారని, అబద్ధమాడకపోతే పూట గడవదు అనే పద్దతి లో రేవంత్ వ్యవహారం ఉందని వ్యంగ్యాస్త్రాలు సంధించారు. ఇక గ్యారంటీల నుంచి ప్రజల దృష్టిని మరల్చేందుకే రేవంత్ రెడ్డి గారడీ మాటలు చెబుతున్నాడని, రేవంత్ రెడ్డికి కాన్సిల్ జబ్బు సోకిందని, ఎన్నికలపుడు తాను చెప్పినవన్నీ కాన్సిల్ అంటున్నాడని అన్నారు. ప్రతిపక్షనేతలు ప్రజల పక్షాన పోరాడుతుంటే వాళ్ళ మరణాన్ని కోరుకుంటున్న నీచ బుద్ది రేవంత్ రెడ్డిది అని, రేవంత్ రెడ్డి నిజాన్ని నమ్ముకోలేదు నిందలనే నమ్ముకున్నాడని, కష్టాన్ని నమ్ముకోలేదు.. కుతంత్రాలనే నమ్ముకున్నాడని ఘాటు వ్యాఖ్యలు చేశారు. ఇకనైనా సీఎం రేవంత్ రెడ్డి తాను ఉన్నది సీఎం పదవిలో అన్న విషయాన్ని గుర్తు తెచ్చుకుని చిల్లర వేషాలు మానితే మంచిదని బీఆర్ఎస్ ఎమ్మెల్యే సూచించారు.
