వైరా నుంచి ఖమ్మం 16 కిలోమీటర్లేనట!

దిశ, వైరా : "నవ్విపోదురు గాక మాకెందుకు సిగ్గు" అన్న చందంగా ఉంది నేషనల్ హైవే, ఆర్ అండ్ బి అధికారుల తీరు. ఖమ్మం నుంచి వైరా వరకు ఉన్న జాతీయ రహదారికి ఇటీవల బీటీ రెన్యువల్ పనులు చేశారు. అనంతరం ఈ జాతీయ రహదారికి పక్కన కిలోమీటర్ల తెలిపే రాళ్ళను ఏర్పాటు చేశారు. ఈ రాళ్లపై రాసిన కిలోమీటర్ల దూరం తప్పుల తడకగా ఉంది. వైరాలోని మేరీ ఇమాక్లేట్ స్కూల్ ముందు జాతీయ రహదారి పక్కన ఖమ్మం దూరం 16 కిలోమీటర్లని తెలుపుతూ రాయిని ఏర్పాటు చేశారు. ఈ రాయి వేసిన ప్రాంతం నుంచి ఖమ్మం 22 కిలోమీటర్ల దూరంలో ఉంది.

అయితే అధికారులు మాత్రం ఈ రాయి‌పై ఖమ్మం 16 కిలోమీటర్ల దూరం అంటూ తప్పుగా రాశారు. అదేవిధంగా వైరాలోని పలు ప్రాంతాల్లో ఏర్పాటు చేసిన కిలోమీటర్ల రాళ్లపై దూరాలు కూడా రెండు మూడు కిలోమీటర్ల తేడాతో తప్పుగా రాశారు. ఈ రాళ్ళను చూసిన స్థానికులు ఆర్‌అండ్‌బి అధికారుల పనితీరును విమర్శిస్తున్నారు. ఆర్‌అండ్‌బి అధికారులు లేదా సిబ్బంది రాళ్లను ఏర్పాటు చేసేటప్పుడు దగ్గరుండి పర్యవేక్షించాల్సి ఉంది. కానీ అధికారులు కనీసం పర్యవేక్షించకపోవడంతో ఈ పరిస్థితి ఏర్పడింది. ఇప్పటికైనా నేషనల్ హైవే ఆర్‌అండ్‌బి అధికారులు తమ తప్పులను సవరించుకుంటారో లేదో చూడాల్సిందే.