హైదరాబాద్ పబ్‌లో చీకటి దందా!
దిశ, డైనమిక్ బ్యూరో: హైదరాబాద్ పబ్‌లు ఇల్లీగల్ యాక్టివిటీస్‌కు అడ్డాలుగా మారుతున్నాయి. తాజాగా జూబ్లీహిల్స్ రోడ్డు నెంబర్ 36లోని ఓ పబ్ కస్టమర్లను ఆకర్షించేందుకు ఏకంగా ‘వైల్డ్ జంగిల్ పార్టీ’ పేరుతో నిర్వహించిన ఈవెంట్ కలకలం రేపుతోంది. విదేశీ వన్యప్రాణులను తీసుకువచ్చి వాటితో కస్టమర్లను ఆకర్షించే ప్రయత్నం సంచలనంగా మారింది. పాములు, తొండలు, పిల్లులు, కుక్కలను బార్‌లో పెట్టి వాటితో కస్టమర్లు ఆడుకునేలా ఏర్పాట్లు చేసింది. నిజానికి ఇటువంటి జంతు ప్రదర్శనపై చట్టప్రకారం నిషేద్ధం ఉన్నప్పటికీ క్లబ్ నిర్వాహకులు మాత్రం అవేమీ మాకు పట్టవు అన్నట్లుగా కస్టమర్ల కోసం జంతువులను అందుబాటులో ఉండటంపై విమర్శలు వెల్లువెత్తుతున్నాయి.
ఈ వన్యప్రాణులకు సంబంధించిన ఫోటోలు, వీడియో క్లిప్పులు సోషల్ మీడియాలో వైరల్ గా మారాయి. ఈ వ్యవహారంపై పలువురు నెటిజన్లు, జంతుప్రేమికులు ఆగ్రహం వ్యక్తంచేస్తున్నారు. ఇలాంటి వారిపై కఠిన చర్యలు తీసుకోవాలని సోషల్ మీడియాలో నెటిజన్లు కోరుతున్నారు. ఓ నెటిజన్ చేసిన ట్వీట్ పై మున్సిపల్ అడ్మినిస్ట్రేషన్ స్పెషల్ చీఫ్ సెక్రటరీ అర్వింద్ రియాక్ట్ అయ్యారు. ఇది దిగ్భ్రాంతికరమైన ఘటన, ఈ విషయాన్ని తెలంగాణ డీజీపీ, సీపీ ఆనంద్, తెలంగాణ పోలీసులు పీసీసీఎఫ్ దృష్టికి తీసుకు వెళ్తానని చెప్పారు.
