Secunderabad Ujjain : సికింద్రాబాద్ ఉజ్జయిని అమ్మవారికి బంగారు బోనం
దిశ, చార్మినార్ : ఆషాఢమాసం పాతనగర బోనాల ఉత్సవాలను పురస్కరించుకుని సప్తమాత్రికలకు సప్త బోనాలులో భాగంగా భాగ్యనగర్ శ్రీ మహంకాళి జాతర ఉమ్మడి దేవాలయాల ఊరేగింపు కమిటి అధ్యక్షుడు గాజుల అంజయ్య ఆధ్వర్యంలో సికింద్రాబాద్ ఉజ్జయిని మహంకాళి అమ్మవారికి గురువారం బంగారు బోనం సమర్పించారు. బ్యాండు చప్పుళ్ళు ...పోతరాజుల వీరంగాల నడుమ... శివసత్తుల నడుమ నిషా క్రాంతి బంగారు బోన మెత్తుకుని మీరాలం మండి శ్రీ మహంకాళి దేవాలయం నుంచి అంగరంగ వైభవంగా ఉరేగింపుగా బయలుదేరారు. అంతకుముందు మీరాలం మండి శ్రీ మహంకాళి అమ్మవారికి భాగ్యనగర్ ఉమ్మడిదేవాలయాల ఉరేగింపు కమిటీ ప్రత్యేక పూజలు నిర్వహించారు.
అనంతరం మీరాలం మండి నుంచి సికింద్రాబాద్ ఉజ్జయిని మహంకాళి దేవాలయానికి చేరుకుని అక్కడ అమ్మవారికి బంగారు బోనం సమర్పించారు. అనంతరం పట్టువస్త్రాలు, ఒడిబియ్యం సమర్పించారు. అంతకు ముందు ఉజ్జయిని మహంకాళి దేవాలయానికి చేరుకున్న ఉమ్మడి కమిటీకి సికింద్రాబాద్ నార్త్ జోన్ డీసీపీ లక్ష్మి పరిమళ, మహంకాళి పి ఎస్ ఇన్ స్పెక్టర్ పరశురామ్ లు ఘనంగా స్వాగతం పలికారు. ఈ కార్యక్రమంలో మహంకాళి జాతర ఉమ్మడి దేవాలయాల ఊరేగింపు కమిటీ అధ్యక్షుడు గాజుల అంజయ్య, ప్రతినిధులు మధుసూదన్ యాదవ్, హన్స్ రాజ్ తదితరులు పాల్గొన్నారు.
