terrible accident : ప్రధాన రహదారిలో నేలకొరిగిన భారీ వృక్షం..

దిశ, చార్మినార్​ : గత కొన్ని రోజులుగా కురుస్తున్న భారీ వర్షాలకు ఆకస్మాత్తుగా భారీ వృక్షం వేళ్ళతో సహా నడిరోడ్డుపై నేలకొరగడం తో ఒకరు మృతి చెందడంతో పాటు మరో ముగ్గురికి గాయాలయ్యాయి. ఈ ఘటన శాలిబండ పోలీస్​ స్టేషన్​ పరిధిలో చోటు చేసుకుంది. ఈ ఘటనలో మూడు యాక్టివా బైక్​లతో పాటు, ఒక గూడ్స్​ ఆటో ధ్వంసమయింది. వివరాలలోకి వెళితే.. సోమవారం మధ్యాహ్నం 2.27గంటల ప్రాంతంలో శంషీర్​గంజ్​ నుంచి గోశాలకు వెళ్లే ప్రధాన రహదారిలో సులభ్​ కాంప్లెక్స్​ కు అలియాబాద్​ వాటర్​వర్క్స్​ కార్యాలయానికి మధ్యలో ఉన్న కొండ చింత అనే 15 ఏళ్ల భారీ వృక్షం (పెల్టోఫోరం) వేళ్లతో సహా నేలకొరిగింది. దీంతో గోశాల నుంచి శంషీర్​ గంజ్​కు, శంషీర్​ గంజ్​ నుంచి గోశాలకు రాకపోకలు సాగిస్తున్న మూడు ద్విచక్రవాహనాల పై చెట్టు కొమ్మలు విరిగిపడ్డాయి.

ఈ ఘటనలో యాక్టివా బైక్ ​పై వెళ్తున్న చందూలాల్​ బాలాదరికి చెందిన మొహమ్మద్​ సాలే (65)కి, చాంద్రాయణగుట్టకు చెందిన షేక్​ అహ్మద్​ (43)లకు తీవ్ర గాయాలయ్యాయి. అంతేగాకుండా యాక్టివా బైక్ ​పై గోశాల నుంచి శంషీర్​ గంజ్​ వైపునకు తల్లీ కొడుకులు వెళ్తుండగా, అదే సమయంలో చెట్టు కూలడంతో తల్లిని ప్రమాదం నుంచి తప్పించబోయి కొడుకు కాలికి గాయలయ్యాయి. గూడ్స్​ ఆటోలో చాక్లెట్లు సరఫరా చేస్తున్న మొహమ్మద్​ ఇబ్రహీం అదే సమయంలో రోడ్డు పక్కన పార్కు చేసి కిరాణా దుకాణంలోకి వెళ్తుండగానే చెట్టు కూలింది. తీవ్రంగా గాయపడిన మొహమ్మద్​ సాలేను, షేక్​ అహ్మద్​లను చికిత్స నిమిత్తం ఆసుపత్రికి తరలించారు.

పరిస్థితి విషమించడంతో ఆసుపత్రిలో చికిత్స పొందుతున్న మొహమ్మద్​ సాలే మృతిచెందాడు. స్థానికుల ద్వారా సమాచారం అందుకున్న శాలిబండ ఇన్​స్పెక్టర్​ రవికుమార్​ తన బృందంతో వెంటనే ఘటనా స్థలికి చేరుకుని పరిస్థితిని సమీక్షించారు. ప్రమాదం జరిగిన రెండు వైపులా బారికేడ్లను ఏర్పాటు చేసి, వాహనాలను మరో రూట్​లో మళ్ళించారు. శాలిబండ పోలీసుల ద్వారా సమాచారం అందుకున్న జీహెచ్ఎంసీ అధికారులు, డిజాస్టర్​ రెస్పాన్స్​ ఫోర్స్​ తో పాటు ఎలక్ర్టిసిటీ అధికారులు ఘటనా స్థలికి చేరుకున్నారు. వెంటనే ఆరూట్​లో అక్కడ విద్యుత్​ సరఫరాను నిలిపివేయించారు. భారీ వృక్షం కింద చిక్కుకున్న బైక్​లను పక్కకు జరిపారు. ఇంకా పూర్తి వివరాలు తెలియాల్సి ఉంది. ఈ కేసును శాలిబండ పోలీసులు దర్యాప్తు చేస్తున్నారు.