రాత్రి పడుకున్న వ్యక్తి తెల్లవారే సరికి మృతి

దిశ,సత్తుపల్లి : అనుమానాస్పద స్థితిలో యువకుడు మృతి చెందిన సంఘటన సత్తుపల్లి మండలం బేతుపల్లిలో చోటు చేసుకుంది. పోలీసులు తెలిపిన వివరాల ప్రకారం ఖమ్మం జిల్లా సత్తుపల్లి మండలం బేతుపల్లి గ్రామంలో పసుమర్తి సాంబశివరావు (32) అనే యువకుడు అనుమానాస్పద స్థితిలో మృతి చెందాడు. సాంబశివరావు కొద్ది రోజుల నుండి వరి గడ్డి తోలకాలకు వెళ్తున్నాడు. అలాగే వెళ్లి వచ్చి రాత్రి ఇంటివద్ద పడుకున్నాడు.

తెల్లవారుజామున కూలీలు వచ్చి పిలిచినా రాకపోవటంతో వారు వెళ్లిపోయారు. అయితే కాసేపటి తరువాత మంచం పక్కన తలభాగంలో గాయాలై అచేతనంగా పడి ఉన్న సాంబశివరావును కుటుంబ సభ్యులు గుర్తించారు. వెంటనే పోలీస్ లకు సమాచారం అందించారు. ఘటనా స్థలానికి చేరుకున్న పోలీసులు అనుమానాస్పద మృతిగా కేసు నమోదు చేసుకుని దర్యాప్తు చేపట్టారు. మృతదేహాన్ని పోస్ట్ మార్టం నిమిత్తం సత్తుపల్లి ప్రభుత్వాసుపత్రి మార్చురీకి తరలించారు.