రేవంత్ రెడ్డికి స్వాగతం పలికిన దిల్ రాజు.. కాంగ్రెస్‌లో చేరనున్నారా?
దిశ, వెబ్‌డెస్క్: తెలంగాణ కాంగ్రెస్ పార్టీ అధ్యక్షుడు రేవంత్ రెడ్డి చేపట్టిన ‘హత్ సే హత్ జోడో యాత్ర’ నిజామాబాద్‌కు చేరుకున్నది. ఈ సందర్భంగా నర్సింగ్‌పల్లిలోని వెంకటేశ్వరస్వామిని మంగళవారం ఉదయం రేవంత్ రెడ్డి దర్శించుకున్నారు. అనంతరం ఆలయంలో ప్రత్యేక పూజలు చేశారు. ఈ సందర్భంగా ఆలయ అధికారులు రేవంత్ రెడ్డిని శాలువాతో ఘనంగా సన్మానించారు. అంతకముందు రేవంత్ రెడ్డి, పాదయాత్ర బృందానికి ప్రముఖ సినీ నిర్మాత దిల్ రాజు స్వాగతం పలికారు. ఆ ఫొటోలను కాంగ్రెస్ శ్రేణులు సోషల్ మీడియాలో పోస్టు చేయగా.. దిల్ రాజు కాంగ్రెస్‌లో చేరబోతున్నారా? అని నెటిజన్లు ప్రశ్నిస్తున్నారు.
కాగా, ఇటీవల బలగం సినిమా ప్రీ రిలీజ్ ఈవెంట్‌ను సిరిసిల్ల జిల్లాలో నిర్వహించారు. ఈ ఈవెంట్‌కు మంత్రి కేటీఆర్‌ను దిల్‌రాజు చీఫ్ గెస్ట్‌గా ఆహ్వానించారు. ఈ సందర్భంగా కేటీఆర్ సమక్షంలో ముఖ్యమంత్రి కేసీఆర్, బీఆర్ఎస్ సర్కార్‌పై దిల్‌రాజు ప్రశంసల జల్లు కురిపించారు. దీంతో అందరూ ఫ్యూచర్‌లో దిల్‌రాజ్ బీఆర్ఎస్‌లో చేరబోతున్నారేమో అనుకున్నారు. అనూహ్యంగా ఇవాళ దిల్‌రాజు కాంగ్రెస్ అధ్యక్షుడు రేవంత్ రెడ్డి పాదయాత్రలో ప్రత్యక్షమవడం ఆసక్తికరంగా మారింది. మరి దీనిపై ఆయన ఏ విధంగా స్పందిస్తారో చూడాలి.
