Bandi Sanjay: ‘చిన్నమ్మ’కు ఘన నివాళులు.. కేంద్ర మంత్రి ట్వీట్
దిశ, డైనమిక్ బ్యూరో: మాజీ కేంద్రమంత్రి సుష్మాస్వరాజ్ గారి వర్ధంతి సందర్భంగా కేంద్ర హోంశాఖ సహాయ మంత్రి బండి సంజయ్ నివాళులు అర్పించారు.ఈ సందర్భంగా ఆయన ఆసక్తికర ట్వీట్ చేశారు. తెలంగాణ రాష్ట్ర అవసరాన్ని ఎలుగెత్తి చాటిన ‘చిన్నమ్మ’, భారత విదేశాంగ విధానానికి కొత్త నిర్వచనం ఇచ్చిన సంస్కర్త, మహిళా సాధికారతకై అనునిత్యం పరితపించిన ధీశాలి, బహుముఖ ప్రజ్ఞాశాలి,మాజీ కేంద్రమంత్రి, పద్మవిభూషణ్ శ్రీమతి సుష్మా స్వరాజ్ గారి వర్ధంతి సందర్భంగా వారికి ఘన నివాళులు అని ఎక్స్ వేదికగా రాసుకొచ్చారు.
కాగా బీజేపీ సీనియర్ నాయకురాలు, మాజీ కేంద్ర మంత్రి సుష్మాస్వరాజ్ 2019, ఆగస్ట్ 6న గుండెపోటుతో మరణించారు. ఆమె తెలంగాణ ప్రత్యేక రాష్ట్ర బిల్లు పార్లమెంట్ లో ఆమోదం పొందేందుకు బీజేపీ తరుపున ముఖ్య పాత్ర పోషించారు. అందుకే తెలంగాణ నాయకులు సుష్మాస్వరాజ్ ను చిన్నమ్మగా పిలుచుకుంటారు. అంతేగాక జమ్ముకాశ్మీర్ కు ప్రత్యేక హోదా రద్దు సహా పలు బిల్లులకు ఆమోదం తెలపడంలో ఆమె పాత్ర ప్రముఖమైనదని చెప్పుకోవచ్చు. అలాగే కేంద్ర విదేశాంగ శాఖ మంత్రిగా చేసినప్పుడు విదేశాంగ విధానంలో పలు సంస్కరణలు తీసుకొచ్చారు. ప్రస్తుతం ఆమె కుమార్తే బన్సూరి స్వరాజ్ లోక్ సభలో ఎంపీగా ఉన్నారు.
