నేనున్నాను ధైర్యంగా ఉండండి

దిశ, బాసర : ధైర్యంగా ఉండండి నేనున్నాను అంటూ బాసర ట్రిపుల్ ఐటీ విద్యార్థులకు భరోసా ఇచ్చారు జిల్లా ఎస్పీ జానకి షర్మిల. వరుస వివాదాల నేపథ్యంలో ఆమె వారానికొకసారి కళాశాలను సందర్శిస్తున్నారు. ఈ నేపథ్యంలో శుక్రవారం ట్రిపుల్ ఐటీ స్టేడియం హాల్ లో నిర్వహించిన కార్యక్రమంలో విద్యార్థులతో ముచ్చటించారు. బాసర ట్రిపుల్ ఐటీని తాను దత్తత తీసుకుంటానని అన్నారు. తాను జిల్లాలో ఉన్నన్ని రోజులు కాలేజీకి మచ్చ రాకుండా చూస్తానని హామీ ఇచ్చారు. నెలలో ఒక రోజు యూనివర్సిటీలో విద్యార్థులతో కలిసి నిద్రిస్తానని తెలిపారు. ప్రతి సమస్యను ఒక చిన్న ఆలోచనతో అధిగమించాలని సూచించారు. కళాశాల ఇన్చార్జి వీసీ గోవర్ధన్, అధ్యాపకులు పాల్గొన్నారు.