పెద్దవాగులో యువకుడు గల్లంతు…

దిశ, ఆసిఫాబాద్: రెబ్బెన మండల కేంద్రానికి చెందిన విఘ్నేష్, అలియాస్ విక్కీ (21) అనే యువకుడు ఆదివారం తన తోటి స్నేహితులతో కలిసి మాద్వాయి గూడ సమీపంలోని జగన్నాథ్ పూర్ ప్రాజెక్టుకు వెళ్లారు. సరదాగా వాగులో దిగి స్నానానికి వెళ్లగా ప్రమాదవశాత్తు నీట మునిగాడు. గమనించిన స్నేహితులు కాపాడే ప్రయత్నం చేసినప్పటికీ ఫలితం లేకుండా పోయింది. సమాచారం అందుకున్న పోలీసులు రెవెన్యూ సిబ్బంది సంఘటన స్థలానికి చేరుకుని పెద్దవాగులో రాత్రి వరకు గాలింపు చర్యలు చేపట్టారు. ప్రాజెక్టు డైవర్షన్ కెనాల్‌లో లోతు ఎక్కువగా ఉండడంతో ఆచూకీ లభించలేదు. సోమవారం ఉదయం గజ ఈతగాళ్ల సహాయంతో గాలింపు చేపట్టారు. మధ్యాహ్నం మూడు గంటల ప్రాంతంలో విఘ్నేష్ మృతదేహం లభ్యమైంది. విఘ్నేష్ మరణవార్తతో గ్రామంలో విషాదఛాయలు అలుముకున్నాయి. ఘటనపై ఎస్సై చంద్రశేఖర్ కేసు నమోదు చేసి దర్యాప్తు చేస్తున్నారు.