ఎన్నికల వేళ ‘నోటు’కు సరికొత్త కోడ్ వర్డ్!
దిశ, రాచకొండ : ఎన్నికల వేళ పైసలు (కరెన్సీ నోట్‌)కు సరి కొత్త పేరు ‘విటమిన్ - ఎమ్’ తెరపైకి వచ్చింది. ఎమ్ అంటే మనీ.. కాగా కార్యకర్తలు, నాయకులకు అభ్యర్థుల వెంట తిరిగాలంటే విటమిన్ - ఎమ్ తప్పనిసరిగా మారింది. విటమిన్ -ఎమ్ ఉంటేనే జోష్, ఎనర్జీ వస్తుందని అందరిలో చర్చ. విటమిన్ - ఎమ్ లేకుంటే రాజకీయ నాయకులు వెంట తిరగడం వేస్ట్ అని కార్యకర్తలో టాక్. మరో వైపు ఎన్నికల ముందు రోజు కొన్ని వర్గాల వారిని ఆకట్టుకునేందుకు విటమిన్ - ఎమ్ తప్పని సరిగా మారిన సందర్భాలు గత కొన్ని ఎన్నికల నుంచి చూస్తున్నాం. అయితే ఇప్పుడు ఆ విటమిన్ - ఎమ్ డంపులపై అందరీ నజర్ ఉంది. ముఖ్యంగా ప్రధాన పార్టీ అభ్యర్థులు ఒకరిని పట్టించేందుకు మరొకరు వారి కార్యకర్తలను గుడాచారులుగా రంగంలోకి దింపారు. ఇక పోలీసులు కూడా విటమిన్ -ఎమ్ డంపుల కోసం నిఘాను పెంచారు. దీని ఇప్పటికే ప్రత్యేక బృందాలు రంగంలోకి దిగాయి. ఎలక్షన్ కమిషన్ ఆదేశాల మేరకు పోలీసులు విటమిన్- ఎమ్ డంపులపై చట్ట పరంగా కఠిన చర్యలు తీసుకునేందుకు సిద్ధంగా ఉన్నారు. విటమిన్ - ఎమ్ డంపుల(కరెన్సీ నోట్లు )సమాచారం ఉంటే డయల్ 100 అంటున్నారు పోలీసు బాసులు.
