తమిళ్ బిగ్‌బాస్‌లో ఎంట్రీ ఇచ్చిన సుచిత్ర
దిశ, వెబ్‌డెస్క్: బిగ్‌బాస్ ప్రోగ్రామ్‌కు అన్ని భాషల్లోనూ చెప్పలేనంత క్రేజ్ ఉంది. అలాంటి బిగ్‌బాస్ ఇంట్లోకి, బయట వివాదాలతో సంచలనం సృష్టించిన సెలెబ్రిటీలు వెళ్తే వచ్చే మజానే వేరు. సరిగ్గా అలాంటి సెలెబ్రిటీనే ఇప్పుడు తమిళ బిగ్‌బాస్ ఇంట్లో అడుగు పెట్టింది. సింగర్, రేడియో జాకీ సుచిత్ర వైల్డ్ కార్డ్ ఎంట్రీగా బిగ్‌బాస్ ఇంట్లో ప్రవేశించింది. రేడియో జాకీగా కెరీర్ మొదలుపెట్టి, తర్వాత సింగర్‌గా, డబ్బింగ్ ఆర్టిస్ట్‌గా పేరు సంపాదించుకున్న సుచిత్ర.. తెలుగులోనూ చాలా పాటలు పాడి, ఎందరికో ఫేవరెట్ సింగర్ అయ్యింది. అయితే 2017లో సుచీలీక్స్ పేరుతో ఆమె సోషల్ మీడియా ఖాతా నుంచి తమిళ నటీనటులు, మ్యూజిక్ డైరెక్టర్లకు సంబంధించిన ప్రైవేట్ ఫొటోలు లీకయ్యాయి. అప్పట్లో సుచీలీక్స్ అని ఓ రేంజ్‌లో ట్రెండ్ అయింది.
కానీ తన సోషల్ మీడియా ఖాతా హ్యాక్ అయ్యిందని, తనకు సుచీలీక్స్‌కు ఎలాంటి సంబంధం లేదని, తాను మానసికంగా కూడా బాగోలేనని చెప్పి సుచిత్ర బ్రేక్ తీసుకుని విదేశాలకు వెళ్లిపోయింది. ఆ తర్వాత కొన్నాళ్లకు మళ్లీ తిరిగొచ్చి తాను పాపులర్ అవడానికి కారణమైన రేడియో జాకీ కెరీర్‌ను పునఃప్రారంభించింది. రేడియో జాకీగా సమాజంలో జరుగుతున్న కొన్ని సంక్లిష్ట కేసుల గురించి మాట్లాడుతూ వార్తల్లో నిలిచింది. ఏ రకంగా చూసినా మనసులో ఉన్నది ఉన్నట్లు చెప్పే సుచిత్ర, బిగ్‌బాస్ ఇంట్లో అడుగుపెట్టాక పరిస్థితులు తారుమారయ్యే అవకాశం కూడా ఉంది. తాను ఇంట్లో అడుగుపెట్టడానికి ముందే పరిస్థితులను కొంత గందరగోళం చేస్తానని నేరుగా కమల్ హాసన్‌తో అనడం కూడా ఇందుకు నిదర్శనం. ఇంకా సుచిత్ర ఎవరనే కన్ఫ్యూజన్ మీకు కలుగుతుంటే, పోకిరి సినిమాలో ‘డోలే డోలే’, మల్లన్న సినిమాలో ‘మియ్యావ్ మియ్యావ్ పిల్లి’, యముడు సినిమాలో ‘నా హృదయం ఎరుగదు’ పాటలు వినండి. ఈ పాటలు పాడింది సుచిత్రనే!
