కోహ్లీ నాపై ఉమ్మేశాడు.. విరాట్‌పై సంచలన ఆరోపణలు చేసిన సౌతాఫ్రికా మాజీ క్రికెటర్ డీన్ ఎల్గర్
దిశ, స్పోర్ట్స్ : టీమ్ ఇండియా స్టార్ బ్యాటర్ విరాట్ కోహ్లీపై సౌతాఫ్రికా మాజీ క్రికెటర్ డీన్ ఎల్గర్ సంచలన ఆరోపణలు చేశాడు. 2015లో భారత పర్యటనకు వెళ్లిన తనను కోహ్లీ దారుణంగా అవమానించాడని, తనపై ఉమ్మేశాడని చెప్పాడు. తాజాగా ‘బాంటర్ విత్ బాయ్స్’ అనే ఓ పోడ్ కాస్ట్‌లో పాల్గొన్న డీన్ ఎల్గర్.. 2015లో భారత పర్యటనను గుర్తు చేసుకున్నాడు. ‘మొదటి టెస్టులో పిచ్ చూస్తే నాకు నవ్వు వచ్చింది. ఆ వికెట్‌పై ఆడటం సవాలుగా అనిపించింది. అప్పటికే అశ్విన్, జడేజా నన్ను స్లెడ్జ్ చేస్తున్నారు. అప్పుడు కోహ్లీ మధ్యలో జోక్యం చేసుకున్నాడు. నాపై ఉమ్మివేశాడు. బ్యాటుతో కొడతానంటూ బండ బూతులు తిట్టాను. అప్పటికే ఏబీ డివిలియర్స్‌ రాయల్ చాలెంజర్స్ బెంగళూరు తరపున ఆడుతుండటంతో నేను అన్నది అతనికి అర్థమైంది. కోహ్లీ తిరిగి నన్ను తిట్టాడు. అతను అలాగే అరుస్తూనే ఉంటాడని పట్టించుకోవడం మానేశాను. మేము భారత్‌లో ఉన్నామని వెనక్కి తగ్గాను.’ అని డీన్ ఎల్గర్ తెలిపాడు.
రెండేళ్ల తర్వాత 2017లో సౌతాఫ్రికా పర్యటనకు వచ్చిన కోహ్లీ తనకు క్షమాపణ చెప్పాడని తెలిపాడు. ‘కోహ్లీ నా వద్దకు వచ్చి ఈ సిరీస్ ముగిసిన తర్వాత మనిద్దరం కలిసి డ్రింక్ చేద్దామా? అని అడిగాడు. తాను చేసిన పనికి క్షమాపణలు చెప్పాలనుకుంటున్నట్టు చెప్పాడు. అందుకు నేను అంగీకరించాను. ఆ సిరీస్ తర్వాత మేము ఇద్దరం తెల్లవారుజామున 3 గంటల వరకు తాగాం. అప్పుడు కోహ్లీ తాగుతున్నాడు. ఇప్పుడు పూర్తిగా మారిపోయాడు.’ అని ఎల్గర్ చెప్పుకొచ్చాడు. కాగా, ఇటీవల డీన్ ఎల్గర్ అంతర్జాతీయ క్రికెట్‌కు రిటైర్మెంట్ ప్రకటించిన విషయం తెలిసిందే. గతేడాది డిసెంబర్‌లో భారత్‌తో టెస్టు సిరీస్‌తోనే అతను ఆటకు వీడ్కోలు పలికాడు.
