Duleep Trophy 2023: దుమ్మురేపిన పుజారా.. దులీప్ ట్రోఫీలో 'సూపర్' సెంచరీ..
దిశ, వెబ్‌డెస్క్: దులీప్ ట్రోఫీ - 2023లో వెస్ట్ జోన్ తరఫున ఆడుతున్న ఛెతేశ్వర్ పుజారా శతకంతో కదం తొక్కాడు. ఫస్ట్ క్లాస్ కెరీర్లో 60వ సెంచరీని నమోదు చేశాడు. దులీప్ ట్రోఫీ 2023లో సెంట్రల్ జోన్తో జరుగుతున్న మ్యాచ్ రెండో ఇన్నింగ్స్లో పుజారా.. వంద పరుగుల మార్క్ను దాటాడు. మూడో రోజు కొనసాగుతున్న ఆటలో పుజారా ప్రస్తుతం.. 132 పరుగులతో (14 ఫోర్లు, 1 సిక్స్) క్రీజులో ఉన్నాడు.
కాగా మూడో రోజు లంచ్ తర్వాత ఆట సాగుతుండగా.. వర్షం ఆటంకం కలిగించింది. దీంతో మ్యాచ్ నిలిచిపోయింది. ప్రస్తుతం వెస్ట్ జోన్ 291/8 తో ఉంది. అయితే విండీస్ పర్యటనకు టీమ్ఇండియా టెస్టు జట్టులో పుజారాకు టీమ్ఇండియా సెలెక్టర్లు మొండి చేయి చూపారు.
అంతకుముందు మొదటి ఇన్నింగ్స్లో వెస్ట్ జోన్ 220 పరుగులకే కుప్పకూలింది. సెంట్రల్ జోన్ బౌలర్ శివమ్‌ మావి (6/43) నిప్పులు చెరిగాడు. తర్వాత బ్యాటింగ్కు దిగిన.. సెంట్రల్ జోన్లో ధృవ్ జోరెల్ (46 ), రింకూ సింగ్ (48) మినహా మిగిలిన బ్యాటర్లు చేతులెత్తేశారు. ఫలితంగా సెంట్రల్ జోన్ జట్టు 128 పరుగులకే ఆలౌట్ అయ్యింది. వెస్ట్ జోన్ బౌలర్లలో నాగస్వల్లా 5 వికెట్లు నేల కూల్చాడు.
