వైద్యులకు సేవ చేసుకోవడం నా అదృష్టం
దిశ, వెబ్‌డెస్క్: కరోనా వైరస్‌ను కట్టడి చేసేందుకు దేశమంతా ఒక్కటైంది. కొవిడ్ 19 మహమ్మారిని భారత్ నుంచి తరిమి కొట్టేందుకు ప్రజలంతా నడుం బిగించారు. ఈ క్రమంలో సినీ ప్రముఖులు చేస్తున్న కృషి గొప్పగా ఉంది. నిరుపేదలను ఆదుకునేందుకు తారలు కోట్లల్లో ఫండ్స్ అందిస్తుండగా.. మరి కొందరు తమ పాట, మాట ద్వారా కరోనాపై అవగాహన కల్పిస్తూ.. ప్రజల్లో భయాన్ని పారదోలే ప్రయత్నం చేస్తున్నారు. కఠిన పరిస్థితుల్లో జనాల్లో స్ఫూర్తి నింపేందుకు అన్ని విధాలుగా యత్నిస్తున్నారు. అయితే కొవిడ్ 19పై పోరులో ప్రత్యక్ష యుద్ధం చేస్తున్న వైద్య సిబ్బందికి ధన్యవాదాలు తెలుపుతూ వారి కోసం హోటల్ ఓపెన్ చేశాడు సోనూసూద్.
Actor #SonuSood opens his hotel at #Juhu, #Mumbai for healthcare workers… OFFICIAL STATEMENT… #COVID19Pandemic #CoronaVirus #Covid_19 #COVID19 #COVIDー19 pic.twitter.com/U0fb8sdN45
— taran adarsh (@taran_adarsh) April 9, 2020
ముంబైలోని జూహులో హోటల్ ప్రారంభించిన సోనూ సూద్… హెల్త్ కేర్ వర్కర్స్ చేస్తున్న కృషి వెలకట్టలేదని… వారి కోసమే ఈ నిర్ణయం తీసుకున్నట్లు చెప్పారు. వైద్య సిబ్బందిని నేషనల్ హీరోలుగా అభివర్ణించిన ఆయన… ఇలాంటి క్లిష్ట పరిస్థితుల్లో వారికి మద్దతిద్దామని పిలుపునిచ్చారు. పగలు, రాత్రి తేడా లేకుండా మనకోసం నిరంతరం పనిచేస్తున్న హెల్త్ కేర్ వర్కర్స్‌కు కనీసం భోజనం చేసే సమయం కూడా ఉండడం లేదన్నారు. అలాంటి హీరోల ఆకలి తీర్చడంతో పాటు హోటల్లో విశ్రాంతి తీసుకునే ఏర్పాటు చేశారు సోనూ సూద్. వివిధ ప్రాంతాల నుంచి వచ్చి సేవలందిస్తున్న వైద్య సిబ్బంది తన హోటల్‌ను వినియోగించుకోవచ్చని సూచించారు. తాను తీసుకున్న ఈ నిర్ణయాన్ని గౌరవంగా భావిస్తున్నానని తెలిపారు. కరోనాపై పోరాటంలో అందరం కలిసి ముందుకు వెళదామని.. మనల్ని రక్షించేందుకు శ్రమిస్తున్న వైద్యులకు సపోర్ట్ చేద్దామన్నారు సోనూ సూద్.
‘అరుంధతి’లో పశుపతి పాత్ర పోషించి గుర్తింపు తెచ్చుకున్న సోనూ సూద్.. తర్వాత పలు చిత్రాల్లో కీలకమైన పాత్రలు పోషించారు. ప్రస్తుతం మెగాస్టార్ చిరంజీవి ‘ఆచార్య’ లోనూ ప్రధాన పాత్రలో కనిపించబోతున్నారు సోనూ.
tags: Sonu sood, Doctors, Health Care workers, Corona, Corona Virus, Covid19
