తమిళనాట చిగురించిన కొత్త పొత్తు?

దిశ వెబ్‌డెస్క్: త్వరలో తమిళనాడు ఎన్నికలు జరగనున్న క్రమంలో అక్కడి రాజకీయాలు హీటెక్కాయి. ఎన్నికలకు మరో కొద్దిరోజులు మాత్రమే సమయం ఉండటంతో.. రాజకీయ పరిణామాలు మారిపోతున్నాయి. తాజాగా తమిళ రాజకీయాల్లో మరో ట్విస్ట్ బయటపడింది. ఎన్నికల వేళ కొత్త పొత్తు చిగురించింది. తమిళనాడు ఎన్నికలంటేనే ఎప్పుడూ ఆసక్తికరంగా మారుతూ ఉంటాయి. కమల్‌హాసన్, శరత్‌కుమార్ లాంటి స్టార్ హీరోలు రాజకీయాల్లో ఉండటంతో.. తమిళనాడు ఎన్నికల గురించి దేశవ్యాప్తంగా చర్చ జరుగుతూ ఉంటుంది.

తాజాగా స్టార్ హీరోలైన కమల్‌హాసన్, శరత్ కుమార్ పొత్తు పెట్టుకోవడం తమిళ రాజకీయాల్లో చర్చనీయాంశంగా మారింది. ఈ విషయాన్ని ఆల్ ఇండియా సమతవ మక్కల్ కచ్చి పార్టీ అధినేత శరత్‌కుమార్ స్వయంగా ప్రకటించారు. కమల్‌హాసన్ పార్టీ మక్కల్ నీది మయిమ్, ఇందియ జననయగ కచ్చి పార్టీలతో తాము పొత్తు పెట్టుకోనున్నట్లు శరత్ కుమార్ ప్రకటించారు.

అయితే ఇటీవల కమల్‌హాసన్‌ను కలిసిన శరత్‌కుమార్ పొత్తుపై చర్చించారు. కానీ పొత్తుకు సంబంధించి కమల్‌హాసన్ నుంచి ఎలాంటి అధికారిక ప్రకటన రాలేదు. కానీ శరత్‌కుమార్ మాత్రం తమ మధ్య పొత్తు కుదిరిందని, తమ కూటమి సీఎం అభ్యర్థి కమల్‌హాసన్ అని ప్రకటించారు. మరి శరత్‌కుమార్ ప్రకటనపై కమల్‌హాసన్ నుంచి ఎలాంటి స్పందన వస్తుందో చూడాలి.