ప్రధానితో మైక్రోసాఫ్ట్ సీఈవో భేటీ.. అందుకు సహకరిస్తామని హామీ

న్యూఢిల్లీ: మైక్రోసాఫ్ట్ చైర్మన్, సీఈవో సత్య నాదెళ్ల ప్రధాని నరేంద్ర మోడీతో దేశ రాజధానిలో సమావేశమయ్యారు. ప్రధానితో సమావేశం స్ఫూర్తిదాయకమని, అంతర్దృష్టితో కూడుకున్నదిగా అభివర్ణించారు. ఈ విషయాన్ని తెలియజేస్తూ గురువారం ఆయన ట్వీట్ చేశారు. డిజిటల్ పరివర్తన ద్వారా నడిచే స్థిరమైన సమ్మిళిత ఆర్థిక వృద్ధిపై ప్రభుత్వం లోతైన దృష్టిని ప్రశంసించారు.

'డిజిటల్ పరివర్తన ద్వారా సుస్థిరమైన, సమ్మిళిత ఆర్థిక వృద్ధిపై ప్రభుత్వ లోతైన దృష్టిని చూడటం స్ఫూర్తిదాయకంగా ఉంది. డిజిటల్ ఇండియా విజన్‌ను గ్రహించి ప్రపంచానికి వెలుగుగా ఉండటంలో భారతదేశానికి సహాయం చేయడానికి మేము ఎదురుచూస్తున్నాము' అని నాదెళ్ల గురువారం ట్వీట్ చేశారు. ప్రస్తుతం ఆయన భారత్‌లో మూడు రోజుల పర్యటనలో ఉన్నారు. దీనిలో భాగంగా కస్టమర్లు, స్టార్టప్స్, డెవలపర్స్, విద్యావంతులు, విద్యార్థులు, ఇతర ప్రభుత్వ నేతలతో ఆయన మారథాన్ సమావేశాలు నిర్వహిస్తున్నారు.