ఫోటోలు: పాతబస్తీలో అర్ధరాత్రి ముజ్రా పార్టీ కలకలం.. డబ్బులు వెదజల్లి..
దిశ, చార్మినార్: అర్థరాత్రి ఓ ఫంక్షన్ హాల్‌లో గుట్టుచప్పుడు కాకుండా జరిగిన ముజ్రా డ్యాన్స్ పార్టీ కలకలం రేపుతోంది. ముజ్రా పార్టీలో యువతులు చేస్తున్న నృత్యాలకు నిర్వాహకులు డబ్బులు వెదజల్లారు. ఈ తంతునంతా తన కెమెరాలో చిత్రీకరిస్తున్నాడు ఓ వీడియా గ్రాఫర్. ఫంక్షన్ జరుగుతుండగానే ముజ్రా పార్టీ వీడియోలు సోషల్ మీడియా వైరల్ అవుతుండడంతో.. సదరు వీడియా గ్రాఫర్‌పై పెళ్లి బృందం దాడికి పాల్పడింది. వీడియా గ్రాఫర్ ఇచ్చిన ఫిర్యాదుతో ముజ్రా పార్టీ బాగోతం వెలుగులోకి వచ్చిన ఘటన చాంద్రాయణగుట్ట పోలీస్ స్టేషన్ పరిధిలో జరిగింది. వివరాల్లోకి వెళితే .. మాదన్న పేట్ యాకుత్ పురాకు చెందిన మహ్మద్ సిద్దిఖీ ఎలియాస్ సోహైల్(31) వృత్తి రీత్యా వీడియా గ్రాఫర్. ఈ నెల 28వ తేదీన పాతబస్తీ వలి ఫంక్షన్ హాల్‌లో పెళ్లి వేడుకలు జరిగాయి.
పెళ్లి వేడుకలను వీడియా గ్రాఫర్ సోహైల్ కవర్ చేస్తున్నాడు. పెళ్లి వేడుకలు సందర్భంగా ముజ్రా డ్యాన్స్ పార్టీని నిర్వాహకుడు నజీర్ ఏర్పాటు చేశారు. ముజ్రా పార్టీలో యువతులు చేస్తున్న నృత్యాలకు డబ్బులు జోరుగా వెదజల్లారు. వేడుకలు జరుగుతుండగానే ముజ్రా డ్యాన్స్ పార్టీకి చెందిన వీడియోలు ఒక్కసారిగా సోషల్ మీడియాలో కలకలం రేపాయి. దీంతో పెళ్లి బృందం వీడియా గ్రాఫర్ సోహైల్ ముఖంపై ఫ్లాష్ లైట్ ఆన్ చేసి మరీ పిడుగుద్దులు కురిపించారు.
తీవ్ర గాయాలైన సోహైల్ వెంటనే చాంద్రాయణగుట్ట పోలీసులుకు ఫిర్యాదు చేశాడు. కేసు నమోదు చేసుకున్న చాంద్రాయణగుట్ట పోలీసులు.. దాడికి పాల్పడ్డ నజీర్, షేక్, సలాం, అబ్దుల్ రజాక్, ఫైజర్ లను అదుపులోకి తీసుకున్నారు. ఈ కేసును చాంద్రాయణగుట్ట పోలీసులు దర్యాప్తు చేస్తున్నారు. ఇది ఇలా ఉండగా.. మూడు నెలల క్రితం మజ్లీస్ పార్టీ నాయకుల రేవ్ పార్టీ కలకలం మరువకముందే.. ముజ్రా పార్టీ ఉదంతంపై విమర్శలు వెల్లువెత్తుతున్నాయి.
