చిరు 'గాడ్ ఫాదర్'లో 10 సర్‌ప్రైజ్‌లు.. అవేంటో తెలుసా?
దిశ, వెబ్‌డెస్క్: మెగాస్టార్ చిరంజీవి ప్రధాన పాత్రలో నటించిన 'గాడ్ ఫాదర్' చిత్రం దసరా పండుగ రోజున విడులకు సర్వం సిద్ధమైంది. ప్రమోషన్స్‌ను పూర్తి చేసుకున్న చిత్ర బృందం విడుదల కోసం ఆసక్తిగా ఎదురుచూస్తోంది. మూవీలో చిరు లుక్స్‌తో పాటు ట్రైలర్, సాంగ్స్‌, మరీ ముఖ్యంగా సల్మాన్ ఖాన్ రోల్‌ సినిమాపై భారీ అంచనాలు పెంచాయి. మోహన్ రాజా దర్శకత్వం వహించిన ఈ చిత్రానికి మెగా పవర్ స్టార్ రాంచరణ్ తేజ్ నిర్మించారు. ఇందులో చిరు సరసన లేడీ సూపర్ స్టార్ నయనతార, మరో కీలక పాత్రలో టాలీవుడ్ యంగ్ యాక్టర్ సత్యదేవ్ నటించారు.
అయితే, ఇటీవల చిత్ర ప్రమోషన్స్‌లో భాగంగా ఓ మీడియా చానల్‌కు ఇచ్చిన ఇంటర్వ్యూలో దర్శకుడు మోహన్ రాజా ఆసక్తికర విషయాలు పంచుకున్నాడు. 'గాడ్ ఫాదర్' నిజంగా మెగా ఫ్యాన్స్‌కు మరో పండుగ అన్నారు. మొత్తం సినిమాలో 10 సర్‌ప్రైజ్‌లు ఉన్నాయని అభిమానుల్లో ఆసక్తిని పెంచారు. తాను తెలుగు సినిమాను డైరెక్ట్ చేసి దాదాపు 21 ఏళ్లు అవుతోందని, ఇన్నేళ్ల గ్యాప్ తర్వాత ఏకంగా మెగాస్టార్‌తో సినిమా అవకాశం రావడం తన అదృష్టంగా భావిస్తున్నట్లు తెలిపారు. ఈ సినిమా అనంతరం చరణ్‌తో 'ధృవ 2' చేయాలని అనుకుంటున్నట్లు పేర్కొన్నారు. కాగా, దర్శకుడు మోహన్ రాజా తెలుగులో చివరగా 'హనుమాన్ జంక్షన్' సినిమా చేసి ప్రేక్షకులను కడుపుబ్బా నవ్వించిన విషయం తెలిసిందే.
