పుట్టినరోజున పొర్లు దండాలు పెట్టిన అభిమాని.. జీవితాంతం గుర్తుండిపోయే సర్‌ప్రైజ్ ఇచ్చిన చిరంజీవి
దిశ, సినిమా: ఆగ‌స్ట్ 22న మెగాస్టార్ చిరంజీవి పుట్టిన‌రోజు జరిగిన విషయం తెలిసిందే. ఇక చిరంజీవి బర్త్‌డే సందర్భంగా సోషల్ మీడియా వేదికగా విషెస్ వెల్లువెత్తాయి. మెగాస్టార్ అభిమానులు తమ అభిమాన హీరో పుట్టిన రోజు కావడంతో.. రక్తదానాలు, అన్నదానాలు చేశారు. ఈ క్రమంలోనే ఈ వీర అభిమాని ఈశ్వరయ్య అనే అతను చిరు పుట్టిన రోజు సందర్భంగా తిరుప‌తి నుంచి తిరుమ‌ల కొండ వ‌ర‌కు పొర్లు దండాలు పెట్టుకుంటూ వెళ్లి తన అభిమానాన్ని చాటుకున్నాడు. ఇందుకు సంబంధించిన వీడియోలు, ఫొటోలు నెట్టింట వైరల్‌గా మారిన సంగ‌తి అందరికీ తెలిసిందే.
అయితే.. ఈ విషయం తెలియ‌గానే చిరంజీవి తన అభిమాని ఈశ్వరయ్య, ఆయ‌న కుటుంబ స‌భ్యుల‌ను హైద‌రాబాద్‌లోని తన ఇంటికి ప్రత్యేకంగా పిలిపించుకుని మాట్లాడారు. అభిమాని కుటుంబానికి పట్టు బ‌ట్టలు పెట్టి స‌త్కరించటం విశేషం. అంతే కాకుండా ఈశ్వరయ్య కుటుంబానికి అండ‌గా ఉంటాన‌ని మెగాస్టార్ హామీనిచ్చారు. ఇందుకు సంబంధించిన ఫొటోలు ప్రజెంట్ సోషల్ మీడియాలో వైరల్ అవుతున్నాయి. కాగా.. గతంలో కూడా ఈశ్వరయ్య తిరుప‌తి నుంచి మెగాస్టార్ ఇంటి వ‌ర‌కు సైకిల్ యాత్రను నిర్వహించారు. అదే విధంగా పవన్ క‌ళ్యాణ్ పుట్టిన‌రోజుకు, జనసేన పార్టీ నెగ్గాల‌ని ఇలా అనేక సార్లు పొర్లు దండాలు చేయ‌టం విశేషం.
