అమెరికాలో హీరో నవీన్ పొలిశెట్టికి యాక్సిడెంట్..!
దిశ, సినిమా: యంగ్ డైరెక్టర్ అనుదీప్ దర్శకత్వంలో కామెడీ ఎంటర్‌టైనర్‌గా తెరకెక్కిన ‘జాతిరత్నాలు’ సినిమాలో హీరోగా నటించి ప్రేక్షకులను కడుపుబ్బా నవ్వించాడు నవీన్ పొలిశెట్టి. ఈ మూవీతో ఓవర్ నైట్ స్టార్ గుర్తింపు సంపాదించుకున్న నవీన్.. గత ఏడాది టాలీవుడ్ సీనియర్ స్టార్ హీరోయిన్ అనుష్క సరసన ‘మిస్ శెట్టి మిస్టర్ పొలిశెట్టి’ చిత్రంలో నటించి ప్రేక్షకులను మెప్పించాడు. సెప్టెంబరు 7న విడుదలైన ఈ సినిమాకు మొదటి షోతోనే పాజిటివ్ టాక్ సొంతం చేసుకుని భారీ వసూళ్లు రాబట్టింది. ఇదిలా ఉంటే.. తాజాగా నవీన్ పోలిశెట్టి ప్రమాదానికి గురైనట్లు వార్తలు వినిపిస్తున్నాయి.
ఓ సినిమా షూటింగ్‌లో భాగంగా అమెరికాలో బైక్ మీద నుంచి జారిపడడంతో నవీన్ చేతికి గాయమైనట్లు సమాచారం. గాయం తీవ్రత ఎక్కువగా ఉండటంతో రెండు నెలలు విశ్రాంతి తీసుకోవాలని డాక్టర్లు సూచించినట్లు తెలుస్తోంది. ప్రముఖ సోషల్ మీడియా ఫ్లాట్ ఫామ్ ఎక్స్ (ట్విట్టర్)లో నవీన్ పొలిశెట్టికి యాక్సిడెంట్ జరిగినట్లు జోరుగా ప్రచారం జరుగుతోంది. తమ అభిమాన నటుడికి ప్రమాదం జరిగినట్లు తెలియడంతో నవీన్ పొలిశెట్టి ఫ్యాన్స్ ఆందోళన చెందుతున్నారు.
