మీ బెడ్‌రూమ్‌లో ఇలా జరిగితే ఊరుకుంటారా? విరాట్ లీక్ వీడియోపై అనుష్క
దిశ, సినిమా : ఇండియన్ క్రికెట్ ప్లేయర్ విరాట్ కోహ్లీ పర్సనల్ రూమ్ వీడియో లీక్‌పై అతడి భార్య, నటి అనుష్క శర్మ ఆగ్రహం వ్యక్తం చేసింది. ప్రస్తుతం టీ20 వరల్డ్ కప్‌లో భాగంగా ఆస్ట్రేలియాలో ఉన్న కోహ్లీ హోటల్ రూమ్ వీడియో ఒకటి నెట్టింట వైరల్ అవుతున్న సంగతి తెలిసిందే. ఈ ఇష్యూపై తాజాగా స్పందించిన అనుష్క.. 'కొంతమంది కనికరం, దయలేని అభిమానుల కారణంగా కొన్ని ఊహించని సంఘటనలు ఎదుర్కొంటాం. కానీ ఇది చాలా చెత్త విషయం. ఒక మనిషి ప్రైవసీని ఉల్లంఘించడం అవమానకరం.
మీరు కూడా ఈ సమస్యలో భాగమే అని తెలుసుకోవాలి. కొంత స్వీయ నియంత్రణను పాటించడం ప్రతి ఒక్కరికి సాయపడుతుంది. అలాగే ఇది మీ పడకగదిలో జరుగుతుంటే.. వెర్ ఈజ్ ది లైన్' అంటూ ప్రశ్నించింది. ప్రస్తుతం ఇందుకు సంబంధించిన పోస్ట్ వైరల్ అవుతుండగా ఈ వీడియోపై స్పందించిన ఆసీస్ ఆడగాడు డేవిడ్ వార్నర్.. 'ఇది చాలా దారుణం. అస్సలు సమ్మతించేది కాదు' అని కామెంట్ చేశాడు. బాలీవుడ్ నటి పరిణితి చోప్రా 'ఓ మై గాడ్.. ఇది దిగజారుడుతనానికి పరాకాష్ట' అంటూ ఫైర్ అయింది.
ఇదిలావుంటే.. 'వ్యక్తిగత స్వేచ్చను హరించేలా ఉన్న ఈ వీడియోను చూసి విరాట్ కోహ్లీ షాక్ అయ్యాడు. 'నా గదిలో నాకే వ్యక్తిగత భద్రత లేకుంటే ఎలా? నా స్వేచ్చకు భంగం కలిగించే అభిమానం నాకు అక్కర్లేదు. ఈ ఉన్మాదపు అభిమానం నాకొద్దు. వినోదం కోసం ఆటగాళ్లను ఓ వస్తువుగా పరిగణించవద్దని విజ్ఞప్తి చేస్తున్నా. అభిమానులు తమ ఫేవరెట్ ఆటగాళ్లను చూసేందుకు, కలిసేందుకు ఉత్సాహం చూపుతారనే విషయం నాకు తెలుసు. వారి ఉత్సాహాన్ని నేను అర్థం చేసుకోగలను. అలాంటి అభిమానులను ఎప్పుడూ నేను అభినందిస్తాను. కానీ, దయచేసి ఆటగాళ్ల ప్రైవసీని గౌరవించండి' అంటూ లీక్ వీడియోను ఉద్దేశిస్తూ విరాట్ అభిమానులను కోరాడు. ఇక సదరు వీడియోలో విరాట్ తన వస్తువులను ఎలా జాగ్రత్తగా పెట్టుకుంటాడనే విషయంతో పాటు తను వాడే ప్రతీ వస్తువు చూపించారు. చివరకు అతని వాష్ రూమ్ కూడా చిత్రీకరించారు. షూస్ కలెక్షన్స్‌ సహా ఫేస్ క్రీమ్స్, కిట్ బ్యాగ్ అన్నీ చూపించగా.. హోటల్ సిబ్బందే అత్యుత్సాహంతో ఈ పని చేసినట్లు తెలుస్తోంది.
