వేట కొడవళ్లతో దారుణ హత్య.. చంపింది ఎవరు..?
దిశ, మహబూబాబాద్: స్నేహితులతో బయటకు వెళ్తున్నానని చెప్పిన యువకుడు తిరిగి ఇంటికి రాలేదు. రక్తపు మడుగులో విగతా జీవిగా కనిపించాడు. ఈ దారుణ ఘటన మహబూబాబాద్ జిల్లా గూడూరు మండలంలో వెలుగుచూసింది. అసలు అతడిని హత్య చేసింది ఎవరు.. స్నేహితులతో బయటకు వెళ్లిన అతడిపై అర్ధరాత్రి దాడి చేసిందెవరు.. వేట కొడవళ్లుతో అతి కిరాతకంగా చంపాల్సిన పనేముంది అని కుటుంబీకులు, స్థానికులు తీవ్ర ఆవేదన వ్యక్తం చేస్తున్నారు.
పూర్తి వివరాళ్లోకి వెళితే.. గూడూరు మండలం భూపతిపేటకు చెందిన కుందారపు విక్రమ్(26) వృత్తిరీత్యా ట్రాక్టర్ డ్రైవర్. ఎప్పటిలాగానే సోమవారం రాత్రి స్నేహితులతో కలిసి బయటకు వెళ్తున్నాని ఇంట్లో చెప్పాడు. అర్ధరాత్రి అయినా విక్రమ్ ఇంటికి తిరిగి రాలేదు. దీంతో కంగారు పడ్డ కుటుంబీకులు కొడుకు కోసం వెతుకులాట ప్రారంభించారు. ఇదే క్రమంలో నర్సంపేట-మహబూబాబాద్ జాతీయ రహదారిపై రక్తం మడుగులో ఉన్న కొడుకును చూసి అక్కడే కుప్పకూలిపోయారు. సమాచారం అందుకున్న పోలీసులు ఘటనా స్థలానికి చేరుకొని విచారణ చేపట్టారు. అనుమానితులకు కూడా అదుపులోకి తీసుకున్నట్టు సమాచారం.
