హైదరాబాద్ పోలీసులకు మంచు సెల్యూట్

దిశ, వెబ్ డెస్క్: కరోనా వైరస్ ప్రపంచ దేశాలను భయబ్రాంతులకు గురిచేస్తోంది. రోజురోజుకూ విస్తృతంగా వ్యాప్తిచెందుతూ విజృంభిస్తోంది. అయితే ఈ రాకాసి వైరస్‌కు ఎదురొడ్డి పోరాడుతూ, ప్రజలను ఎప్పటికప్పుడూ అప్రమత్తం చేస్తున్న పోలీసులు నిజమైన సూపర్ హీరోలని టాలీవుడ్ సెలబ్రిటీ మంచు లక్ష్మి అభినందించారు. తమ కుటుంబాలను సైతం పక్కట బెట్టి, ప్రజల కోసం ప్రాణాలకు తెగించి పోలీసులు సేవలు అందిస్తున్నారని అభివర్ణించారు. అందుకే హైదరాబాద్ పోలీసులందరికీ సెల్యూట్ చేస్తున్నానని పేర్కొన్నారు.

లాక్ డౌన్ సమయంలో పోలీసులు ఎంత కష్టపడి పనిచేస్తున్నారో కళ్లారా చూస్తున్నామని, తెలంగాణ ప్రాంతంలో 98 మంది పోలీసు అధికారులకు కరోనా సోకి డ్యూటీ నుంచి వైదొలగాల్సిన పరిస్థితి ఏర్పడిందని తెలిపారు. వాళ్లందరూ కోలుకుని విధుల్లో చేరారని విన్నానని, సూపర్ మ్యాన్, స్పైడర్ మ్యాన్, రాముడు, హనుమంతుడు, కృష్ణుడు అని పుస్తకాల్లో చదువుకున్నామని, కానీ పోలీసులే ప్రత్యక్ష దైవాలని పేర్కొన్నారు. పోలీసులకు ఎన్నిసార్లు కృతజ్ఞతలు తెలిపినా రుణం తీరదని అన్నారు. ఈ మేరకు ఓ వీడియో రిలీజ్ చేశారు. ఈ వీడియోను హైదరాబాద్ పోలీస్ కమిషనర్ అంజనీ కుమార్ ట్విట్టర్ లో పంచుకున్నారు.