కమల్ పుట్టినరోజు… ట్రెండింగ్‌లో హ్యాపీబర్త్‌డే లీడర్
దిశ, వెబ్‌డెస్క్ :
వెండితెరపై ఎన్నో ప్రయోగాలకు ఆయన ఆద్యుడు.. నటనలో వైవిధ్యం కోసం ఎంతటి రిస్క్‌కైనా వెనుకాడడు. గెలుపోటముల సంగతి పక్కనబెడితే పాత్ర కోసం ప్రాణాలు సైతం లెక్కచేయడు. అందుకే ఆయన ప్రేక్షకుల గుండెల్లో లోకనాయకుడిగా సుస్థిర స్థానాన్ని సంపాదించుకున్నాడు. విశ్వనటుడిగా కీర్తి పొందుతున్నాడు. ఇన్ని ప్రత్యేకతలున్న ‘ద వన్ అండ్ ఓన్లీ కమల్ హాసన్’ గురించి ఎంత చెప్పిన తక్కువే అవుతుంది. నటుడిగానే కాక దర్శకుడిగా, నిర్మాతగా, సింగర్‌గా, నృత్యదర్శకుడిగా తన ప్రస్థానాన్ని కొనసాగిస్తున్న కమల్.. ఈ రోజు 66వ పుట్టినరోజు జరుపుకుంటున్న సందర్బంగా సినీ, రాజ‌కీయ ప్ర‌ముఖులు నుండి శుభాకాంక్షలు వెల్లువెత్తుతున్నాయి. ఈ క్రమంలోనే ఆయనకు బర్త్ డే విషెస్ చెప్పడానికి అభిమానులు ఆయన ఇంటి వద్దకు చేరుకున్నారు.
‘కలత్తూర్ కన్నమ్మ’ అనే చిత్రంలో బాల నటుడిగా తన సినీ జీవితాన్ని ఆరంభించిన కమల్.. మొట్టమొదటి చిత్రానికే జాతీయ పురస్కారం అందుకోవడం విశేషం. ఆ తర్వాత కూడా ఎంజీ రామచంద్రన్, శివాజీ గణేషన్, నగేష్, జెమినీ గణేషన్ నిర్మించిన పలు చిత్రాల్లో బాల నటుడిగా నటించి మెప్పించాడు. ఇక 70వ దశకంలో తాను పూర్తి స్థాయి నటుడిగా కెరీర్ ఆరంభించారు. హీరోగా “అవర్‌గళ్”, “అవళ్ ఓరు తొడరర్‌కదై”, “సొల్ల తాన్ నినైక్కిరేన్”, “మాణవన్”, “కుమార విజయం” లాంటి చిత్రాల్లో నటించినప్పటికీ శ్రీదేవి‌తో ఆయన నటించిన ’16 వయదినిలె (తెలుగులో పదహారేళ్ళ వయసు)’ చిత్రం ఆయనకు తొలి బ్రేక్‌ను అందించింది. ఆ తర్వాత వెండితెరపై అనేక ప్రయోగాలు చేసిన కమల్.. తన నట విశ్వరూపంతో మూడుసార్లు జాతీయ ఉత్తమ నటుడి పురస్కారాన్ని అందుకొన్నాడు. కాగా నేడు కమల్ 66 పుట్టినరోజు సందర్భంగా శుభాకాంక్షలు తెలిపేందుకు అభిమానులు, పార్టీ స‌భ్యులు ఆయన ఇంటి వద్దకు భారీగా చేరుకున్నారు. కాగా కమల్ వారంద‌రికీ కారులో నుండే ధ‌న్య‌వాదాలు తెలిపారు. ప్ర‌స్తుతం ఈ ఫోటోలు సోషల్ మీడియాలో హ‌ల్‌చ‌ల్ చేస్తున్నాయి. అయితే కరోనా పాండమిక్ సమయం కావడంతో.. అభిమానులు ఎక్కువ సంఖ్యలో గుమిగూడకుండా సోషల్ మీడియా ప్లాట్‌ఫామ్‌లోనే లోకనాయకుడి పుట్టినరోజు సంబరాలు చేసుకుంటున్నారు. ఈ సందర్భంగా కమల్ ఫ్యాన్స్ ట్విట్టర్ వేదికగా.. ‘హ్యాపీ బర్త్‌డే లీడర్’ హ్యాష్‌ట్యాగ్‌ను ట్రెండ్ చేస్తున్నారు.
ప్ర‌స్తుతం కమల్ హాసన్ ‘భార‌తీయుడు 2’ చిత్రంతో పాటు బిగ్ బాస్ త‌మిళం సీజ‌న్ 4కు హోస్ట్‌గా కూడా వ్యవహరిస్తున్న విషయం తెలిసిందే.
