ఇన్‌స్టాగ్రామ్‌‌లో లక్షలు సంపాదించవచ్చు.. ఎలానో తెలుసా ?
దిశ, వెబ్‌డెస్క్ : నెట్ సౌకర్యం అందుబాటులోకి వచ్చినప్పటి నుంచి చాలా మంది ఇంటిలో ఉండి డబ్బులు సంపాదించడం మొదలు పెట్టారు. కొంత మంది ఎప్పుడూ ఫోన్ పట్టుకొని కనిపిస్తారు, నెల చివరకు వచ్చే సరికి నేను ఇంత సంపాదించాను అని ఇంటిలో వారికి చెబుతారు. అయితే ప్రస్తుతం అందరూ సోషల్ మీడియా ద్వారా డబ్బు సంపాదించడానికే మార్గాలు వెతుకుతున్నారు. ఈ నేపథ్యంలో ఇన్ స్టాగ్రామ్ తన యూజర్స్‌కి తీపి కబురు అందించింది. లక్షలు సంపాదించాలి అనుకునే ఇన్‌స్టా యూజర్సకి మార్గం చూపెట్టింది. ట్విట్టర్‌ ఇప్పటికే సూపర్‌ ఫాలో అనే ఫీచర్‌ను తీసుకొచ్చి సక్సెస్ అయిన విషయం తెలిసిందే. దీంతో ఇన్‌స్టాగ్రామ్‌ మరో కొత్త ఆలోచనతో ముందుకు వచ్చింది. ఇన్‌స్టాగ్రామ్‌ ఎక్స్‌క్లూజివ్‌ స్టోరీస్‌ అనే ఫీచర్‌ అందుబాటులోకి తీసుకువచ్చింది. ఈ ఫీచర్‌లో అద్భుతమైన కంటెంట్ మీరు క్రియేట్ చేయగలిగితే ఇక లక్షలు మీ సొంతం అవుతాయి.
అవకాశం ఎలా..
ఇన్ స్టాగ్రామ్ అకౌంట్ ఉన్న ప్రతీ ఒక్కరికీ ఈ అవకాశం ఉంటుందా.. అనేగా మీ ఆలోచన.. ఇన్‌స్టాగ్రామ్‌ నుంచి క్రియేటర్ బ్యాడ్జ్ సాధించిన వారికి ఈ అవకాశం ఉంటుంది. ఈ బ్యాడ్జ్ ఉన్న వారి స్టోరీలను కూడాఅందరూ చూడలేరు. డబ్బులు చెల్లించి మెంబర్‌ షిప్‌ తీసుకున్న వారు మాత్రమే వీరి కంటెంట్‌ను చూసే వెసులుబాటు కల్పించారు. అయితే ఒక్కసారి మీరు ఇన్ స్టాలో క్రియేటర్ బ్యాడ్జ్ సాధిస్తే ఇకపై లక్షలు మీ సొంతం అనమాట. ప్రస్తుతం ఈ ఫీచర్‌ను బీటా యూజర్లకు ప్రయోగాత్మకంగా అందుబాటులోకి తీసుకొచ్చారు. త్వరలోనే అందరికీ అందుబాటులోకి తీసుకురానున్నారు.
