జామాయిల్ తోటలో కుటుంబం ఆత్మహత్య

దిశ, వెబ్‌డెస్క్: పశ్చిమగోదావరి జిల్లాలో విషాదం చోటు చేసుకుంది. పాలకోడేరు మండలం కుముదవల్లి గ్రామ శివారులోని జామాయిల్ తోటలో ఓ కుటుంబం ఆత్మహత్యకు పాల్పడింది. మృతులను యనదుర్రు గ్రామానికి చెందిన దంపతులు సీరే పరశురాం (45), ధన సావిత్రి (35), కుమారుడు నాగవెంకట శ్రీనివాస్ (12)గా గుర్తించారు. కుటుంబసభ్యులు పురుగుల మందు తాగి సూసైడ్ చేసుకున్నట్లు స్థానికులు అనుమానిస్తున్నారు. అత్తిలి గ్రామానికి చెందిన ఓ మహిళకు ఈ కుటుంబం మధ్యవర్తిగా ఉండి రూ.45లక్షలు అప్పు ఇప్పించిందని, ఇటీవల ఆమె కనిపించకుండా పోవడంతో డబ్బులు తిరిగిరావన్న భయంతోనే ఆత్మహత్య చేసుకున్నట్లు స్థానికులు చెబుతున్నారు. ఘటనాస్థలికి చేరుకున్న పోలీసులు మృతదేహాలను పోస్టుమార్టం నిమిత్తం ప్రభుత్వాస్పత్రికి తరలించారు. కేసు నమోదు చేసుకొని దర్యాప్తు చేస్తున్నారు.